ភីហ្សា គឺជាតារាសម្តែងមួយរូបដែលមានភាពល្បីល្បាញនៅលើបណ្តាញសង្គម TikTok ហើយជានិច្ចជាកាលគេតែងតែបង្ហោះវីដេអូកម្សាន្តនានា ដូចជាការសម្តែង និងការរាំលេងកម្សាន្តជាដើម។ ដោយភាពក្រមិចក្រមើម និងមានការចូលចិត្តពីបណ្តាអ្នកប្រើប្រាស់បណ្តាញសង្គមមួយនេះ បានធ្វើឱ្យរូបគេមានការកើនឡើងចំនួនអ្នកចុចតាមដានជាហូរហែ មិនតែប៉ុណ្ណោះ ភីហ្សា ក៏ធ្លាប់ត្រូវបានម្ចាស់ផលិតផលមួយចំនួនទាក់ទងដើម្បីថតផ្សព្វផ្សាយផលិតផលផងដែរ។ ទោះបីជាពេលកន្លងមក រូបគេបានបង្ហាញតែភាពសប្បាយរីករាយនៅតាមបណ្តាញសង្គមអនឡាញក៏ពិតមែន តែបើក្រឡេកទៅមើលជីវិតពិតជាក់ស្តែងវិញឃើញថា ភីហ្សា គឺជាមនុស្សម្នាក់ដែលមានការតស៊ូព្យាយាមនៅក្នុងជីវិតជាខ្លាំង ពោលគឺជាមនុស្សដែលមានការខិតខំប្រឹងប្រែងរកស៊ីដោយប្រើកម្លាំងញើសឈាមខ្លួនឯង គឺមានការដើរលក់ម្ជូររាត្រីនៅតាមតំបន់កម្សាន្តនានាក្នុងទីក្រុងភ្នំពេញ។ ដោយការឧស្សាហ៍ព្យាយាម និងមានទេពកោសល្យពីកំណើតផងនោះ ធ្វើឱ្យផលិតករខ្សែភាពយន្ត លោក សោម ដូរ៉េ បានទាក់ទងរូបគេមកសម្តែងនៅក្នុងរឿង “ផ្កាយពេជ្រ” ដែលមានការចាក់បញ្ចាំងនៅលើស្ថានីយទូរទស្សន៍ប៉ុស្តិ៍លេខ5។ ថ្វីត្បិតថានេះគឺជាលើកដំបូង និងជារឿងទីមួយដែលរូបគេបានសម្តែងក៏ពិតមែន ប៉ុន្តែអ្វីដែលបានត្រលប់មកវិញគឺការពេញចិត្តពីសំណាក់ផលិតករ និងមានអ្នកគាំទ្រជាច្រើនក៏បានសរសើរនូវសមត្ថភាពសម្តែងរបស់គេផងដែរ។ បន្ទាប់ពីរឿងទីមួយដែលខ្លួនបានសម្តែងទទួលបានភាពជោគជ័យ ក៏ដូចជាមានការគាំទ្រយ៉ាងច្រើនលើសលប់បែបនេះ ភីហ្សា ក៏ទទួលបានឱកាសសម្តែងរឿងទីពីររបស់ខ្លួនពីផលិតករដដែល ក្នុងរឿង “ទេវបុត្រ4G រាជនី79” ដោយបច្ចុប្បន្នរឿងនេះបាននឹងកំពុងធ្វើការថត និងមានការចាក់បញ្ចាំងឆាប់ៗនេះនៅលើស្ថានីយទូរទស្សន៍ប៉ុស្តិ៍លេខ5 ។
ទោះបីជាបទពិសោធន៍នៅក្មេងខ្ចីក៏ពិតមែន ប៉ុន្តែភីហ្សាក៏បានទទូចសុំឱ្យមហាជនជួយគាំទ្រស្នាដៃសម្តែងរឿងទីពីររបស់ខ្លួន ហើយសន្យាថានឹងព្យាយាមសម្តែងឱ្យអស់ពីសមត្ថភាពមិនឱ្យផលិតករនិងអ្នកគាំទ្រមានការខកបំណងមកលើរូបគេឡើយ ៕
