ខេត្តកំពត ៖
នៅថ្ងៃទី២២ខែសីហាឆ្នាំ២០២៤ វេលាម៉ោង១៩និង៣៥នាទី មានករណីគ្រោះថ្នាក់ចរាចរណ៍មួយ បានកើតឡើងរវាងម៉ូតូសណ្តោងរ៉ឺម៉កនិងម៉ូតូ បើកបរបញ្រ្ចាសទិស ដៅគ្នា លើកំណាត់ផ្លូវកៅស៊ូ ស្ថិតនៅភូមិ ចំការមន ឃុំតាកែន ស្រុកឈូកខេត្តកំពត បណ្តាលឲ្យស្លាប់២នាក់ និងរងរបួសធ្ងន់ម្នាក់ ។
អ្នកបើកបរម៉ូតូសណ្តោងរ៉ឺម៉កដែលជាភាគីបង្ក មានឈ្មោះ ហែម ហឿន ភេទប្រុស អាយុ៦០ឆ្នាំ បើកបរម៉ូតូម៉ាកវ៉េវ ពណ៌ស គ្មានស្លាកលេខនិងកន្ទុយរ៉ឺម៉ក ពណ៌ខៀវ គ្មានស្លាកលេខ រងរបួសធ្ងន់ ត្រូវបានបញ្ជូនទៅកាន់មន្ទីរពេទ្យបង្អែកស្រុកឈូក ។
ចំណែកភាគីម៉ូតូរងគ្រោះ មានគ្នា២នាក់ជាប្តីប្រពន្ធ ហើយ ប្តី មានឈ្មោះលុយ យីម ភេទប្រុសអាយុ៦០ឆ្នាំ បើកបរម៉ូតូម៉ាក C125 ពណ៌ខ្មៅពាក់ស្លាកលេខកំពត1L7556 ស្លាប់នៅកន្លែងកើតហេតុ។ រីឯស្ត្រីជាប្រពន្ធ ឈ្មោះយិន ហន់ ភេទស្រីអាយុ៥៥ឆ្នាំ បានស្លាប់នៅកន្លែងកើតហេតុផងដែរ ហើយ សពជនរងគ្រោះទាំង២នាក់ ត្រូវបានប្រគល់ជូនសាច់ញាតិធ្វើបុណ្យតាមប្រពៃណី ។
ចំពោះវត្ថុតាង ត្រូវបានសមត្ថកិច្ច យកទៅរក្សាទុកនៅអធិការដ្ឋាននគរបាលស្រុកឈូកដើម្បីរង់ចាំដោះស្រាយនៅពេលក្រោយ ៕
