ខេត្តកំពង់ឆ្នាំង ៖
រថយន្តបែនដឹកដីមួយគ្រឿងកំពុងធ្វើចរាចរណ៍តាមផ្លូវសុខៗ ស្រាប់តែរបូតគន្លឹះសណ្តោងរ៉ឺម៉កខាងក្រោយ បណ្តាលឲ្យបុករះចូលផ្ទះជួលមួយកន្លែងនិងតូបលក់ដូរតាមមាត់ថ្នល់ បណ្តាលឲ្យរងការខូចខាតទ្រព្យសម្បត្តិប្រជាពលរដ្ឋនិងមនុស្សម្នាក់ រងរបួសធ្ងន់។
ហេតុការណ៍គ្រោះថ្នាក់ខាងលើនេះ បានកើតឡើងវេលាម៉ោងប្រមាណជា២និង១៥នាទីថ្ងៃទី២៧ ខែសីហា ឆ្នាំ២០២៤ នៅត្រង់ចំណុចលើផ្លូវក្រាលកៅស៊ូលេខ១៥០A ចន្លោះបង្គោលគីឡូម៉ែត្រ លេខ០១និង២ ស្ថិតនៅភូមិសាលាលេខ៥ ឃុំអូរឬស្សី ស្រុកកំពង់ត្រឡាច ខេត្តកំពង់ឆ្នាំង។
ប្រភពពីសាក្សី ដែលបានឃើញហេតុការណ៍ខាងលើ បានឲ្យដឹងថាមុនពេលកើតហេតុមានរថយន្តបែនដឹកដីមួយគ្រឿងមិនស្គាល់ម៉ាក ក្បាលពណ៌ស ទ្រុងពណ៌ខ្មៅ សណ្តោងរ៉ឺម៉ក ពណ៌ខ្មៅ កំពុងបើកបរសុខៗ ស្រាប់តែរបូតកន្ទុយសណ្តោងរ៉ឺម៉កផ្នែកខាងក្រោយ រេទៅខាងឆ្វេងនៃផ្លូវ ទៅបុកស្ត្រីម្នាក់ឈ្មោះ នួន ណា អាយុ៤៥ឆ្នាំ កំពុងឈរទិញឥវ៉ាន់ បណ្តាលឲ្យរងរបួសធ្ងន់ និង ម៉ូតូចតខាមុខតូបចំនួន១គ្រឿង ម៉ាក C125 ពណ៌ខ្មៅ ពាក់ផ្លាកលេខភ្នំពេញ 1HQ-2464 បានរងការខូចខាតយ៉ាងដំណំ រួចក៏បន្តទៅបុករះតូបលក់ចំនួន២តូបទៀត។
ក្រោយកើតហេតុ អ្នកបើកបររថយន្តបង្ក បានទុករថយន្តចោល រួចរត់គេចខ្លួនបាត់ស្រមោល។ ចំពោះវត្ថុតាង មានម៉ូតូ០១គ្រឿង រថយន្តនិងកន្ទុយសណ្តោងរ៉ឺម៉កខាងក្រោយ ត្រូវបានយកមករក្សាទុកនៅអធិការនគបាលស្រុកកំពង់ត្រឡាច ដោយឡែក ជនរងគ្រោះ ត្រូវបានបញ្ជូនមកសង្គ្រោះបន្ទាន់ផងដែរ ៕
