ខេត្តព្រះសីហនុ ៖

យោងតាមព័ត៌មានបឋមពីកន្លែងកើតហេតុ បានឲ្យដឹងថាមនុស្ស២ បានស្លាប់និងរបួសធ្ងន់ស្រាល២៥នាក់ នៅស្រុកកំពង់សិលា នាព្រឹកថ្ងៃទី២៨ ខែសីហាឆ្នាំ២០២៤នេះ នៅក្នុងគ្រោះថ្នាក់ចរាចរណ៍រថយន្តទួរីសដឹកកម្មករមួយគ្រឿង បានបុកគ្នាជាមួយរថយន្តដឹកទំនិញ១គ្រឿងទៀត នៅចំណុចក្បែរវិទ្យាល័យស្រុកកំពង់សិលា ខេត្តព្រះសីហនុ ។

យោងតាមប្រភពពីលោក សេង សូរីណា អធិការស្ដីទី នៅអធិការដ្ឋាននគរបាលស្រុកកំពង់សិលា បានឲ្យដឹងថាគ្រោះថ្នាក់ចរាចរណ៍នោះ កើតឡើងនៅវេលាម៉ោងប្រមាណ៧:៥០នាទីព្រឹកថ្ងៃទី២៨ខែ សីហា ឆ្នាំ២០២៤នេះ នៅតាមបណ្តោយផ្លូវជាតិលេខ ៤ ត្រង់ចំណុចក្បែរនៅវិទ្យាល័យស្រុកកំពង់សិលា ហើយ រថយន្តទូរីសដឹកកម្មករពាក់ស្លាកលេខ 2A-1524 បានបុកជាមួយរថយន្តដឹកទំនិញ១គ្រឿងពណ៌ស បើកបរក្នុងទិសដៅផ្ទុយគ្នា បណ្ដាលឲ្យអ្នកបើកបររថយន្តទូរីសស្លាប់នៅនិងកន្លែងកើតហេតុ និង ម្នាក់ទៀតស្លាប់ នៅពេលបញ្ជូនទៅដល់មន្ទីរពេទ្យ ។ 

ចំណែកជនរងគ្រោះដទៃទៀត ត្រូវបានរថយន្តសង្គ្រោះនៃមន្ទីរពេទ្យបង្អែកស្រុកកំពង់សាលានិងរថយន្តសង្គ្រោះរបស់អធិការរដ្ឋាននគរបាលស្រុកកំពង់សាលា ដឹកទៅកាន់មន្ទីរពេទ្យខេត្តកំពង់ស្ពឺដែលនៅជិត ដើម្បីជួយសង្គ្រោះ ៕