គ្រូភ្នំពេញក្រោន សរសើរយុទ្ធសាស្ដ្រការពារវាយបកដ៏មានប្រសិទ្ធភាព របស់ទ័ព

ភ្នំពេញក្រោន រកបាន៦ពិន្ទុពេញ ខណៈកងយោធពលខេមរភូមិន្ទ ចាញ់២សប្ដាហ៍ផ្ទួនៗគ្នា ទោះជាបរាជ័យ តែលោក Oleg  ដែលជាគ្រូបង្វឹករបស់ក្លិបបាល់ទាត់ភ្នំពេញក្រោន នៅតែសម្លឹងឃើញពីទម្រង់លេងដ៏ល្អរបស់ក្រុមកងយោធពលខេមរភូមិន្ទ ។ 

គ្រូបង្វឹកសញ្ជាតិអ៊ុយក្រែនរូបនេះ ក៏បាននិយាយថាក្រុមភ្នំពេញក្រោន ពិបាករកគ្រាប់បាល់ណាស់ ក្នុងជំនួបជាមួយក្រុមកងយោធពលខេមរភូមិន្ទ ហើយក៏ប្រយ័ត្នប្រយែងខ្លាំងចំពោះការវាយបកមកវិញផងដែរ ។ ក្នុងសប្ដាហ៍ទី២នេះ ក្រុមព្រះខ័នរាជស្វាយរៀង បានឈ្នះ ក្រុមអាយ អេស អាយ ដង្កោសែនជ័យ ក្នុងលទ្ធផល៤ទល់និង១ នៅកីឡដ្ឋាន AIA KMH Park ។ 

ចំណែក ក្រុមគិរីវង់សុខសែនជ័យ បានចាញ់ក្រុមភ្ញៀវបឹងកេត ក្នុងលទ្ធផល២ទល់និង១ នៅកីឡដ្ឋានគិរីវង់សុខសែនជ័យ ក្រុងដូនកែវ ខេត្តតាកែវ។ រីឯក្រុមមកពីលីគ២ បានជួបគ្នាម្ដងទៀតនៅលីគកំពូល ដោយក្រុមសមាគមបាល់ទាត់ក្រសួងមហាផ្ទៃ ប្រកួតស្មើជាមួយឡាយហ្វ៍ អេហ្វស៊ី មកពីខេត្តព្រះសីហនុ ក្នុងលទ្ធផល១ទល់និង១ នៅកីឡដ្ឋាន AIA KMH Park ផ្លូវវេងស្រេង រាជធានីភ្នំពេញ ។ យ៉ាងណាមិញ សម្រាប់ក្រុមណាហ្គាវើលដ៍ ក៍បានយកឈ្នះលើក្រុមវិសាខា ក្នុងលទ្ធផល១ទល់និង០ នៅកីឡដ្ឋានព្រីនស៍ ហ្គ្រេនភ្នំពេញ ។

គួរបញ្ជាក់ផងដែរថា គិតត្រឹមសប្ដាហ៍ទី២ តារាងចំណាត់ថ្នាក់បណ្ដោះអាសន្ន ក្រុមព្រះខ័នរាជស្វាយរៀង បន្តគ្រងចំណាត់ថ្នាក់លេខ១ ,ក្រុមភ្នំពេញក្រោន គ្រងចំណាត់ថ្នាក់លេខ២ និងក្រុមណាហ្គាវើលដ៍ គ្រងចំណាត់ថ្នាក់លេខ៣ មាន៦ពិន្ទុស្មើគ្នា។ ចំណែកក្រុមបឹងកេត  ឈរនៅចំណាត់ថ្នាក់លេខ៤ តាមពីក្រោយដោយក្រុមអង្គរថាយហ្គឺរ ឈរចំណាត់ថ្នាក់លេខ៥ និងក្រុមអាយ អេស អាយ ដង្កោសែនជ័យ  ឈរនៅចំណាត់ថ្នាក់លេខ៦ មាន៣ពិន្ទុដូចគ្នា។ រីឯ ក្រុមឡាយហ្វ៍ អេហ្វស៊ី ខេត្តព្រះសីហនុ ឈរនៅចំណាត់ថ្នាក់លេខ៧ និងសមាគមកីឡាបាល់ទាត់ក្រសួងមហាផ្ទៃ ឈរនៅចំណាត់ថ្នាក់លេខ៨ មាន១ពិន្ទុ ស្មើគ្នា។ ចំនែកក្រុមវិសាខា ឈរចំណាត់ថ្នាក់លេខ៩ មិនមានពិន្ទុ ដូចក្រុមគិរីវង់សុខសែនជ័យ លេខ១០ និងកងយោធពលខេមរភូមិន្ទ ឈរនៅចំណាត់ថ្នាក់លេខ១១ មិនទាន់មានពិន្ទុ ។