.png)
រាជធានីភ្នំពេញ ៖
យុវជនមួយក្រុមមានគ្នា០៤នាក់ ធ្វើដំណើរដោយរថយន្តម៉ាក តូយ៉ូតា ហាយឡែនឌ័រ មួយគ្រឿង បើកឆ្លងកាត់ផ្លូវបំបែកជាបួន ស្រាប់តែត្រូវរថយន្តមិនស្គាល់ម៉ាកមួយគ្រឿងទៀតបុកពីចំហៀងពេញទំហឹង ធ្វើឲ្យខ្ទាតរថយន្តទៅបុករនាំងដែកបាំងប្រឡាយទឹកស្អុយប៊ិះធ្លាក់ ឯរថយន្តបង្ក បើករត់បាត់ស្រមោល ។
ករណីគ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១១និង៣០នាទីយប់ ថ្ងៃទី២២ ខែសីហា ឆ្នាំ ២០២៤ នៅតាមបណ្ដោយផ្លូវ១០៥ កែងផ្លូវ៣៦០ ក្នុងសង្កាត់បឹងកែងកងទី៣ ខណ្ឌចំការមន រាជធានីភ្នំពេញ ។
តាមប្រភពព័ត៌មានពីកន្លែងកើតហេតុ បានឲ្យដឹងថាដំបូងឡើយ គេឃើញរថយន្តម៉ាក ហាយឡែនឌ័រ ពណ៌ខ្មៅ ពាក់ផ្លាកលេខ ភ្នំពេញ 2AM-7378 បើកបរដោយយុវជនម្នាក់ និងមានគ្នា៣នាក់ជិះជាមួយ តាមបណ្ដោយផ្លូវ១០៥ ទិសដៅពីត្បូងមកជើងក្នុងល្បឿនល្មម រួចក៏ឆ្លងកាត់ផ្លូវ៣៦០។ ភ្លាមនោះ ស្រាប់តែមានរថយន្តមួយគ្រឿងទៀតមិនចាំម៉ាក បានធ្វើដំណើរតាមបណ្ដោយផ្លូវ៣៦០ ទិសដៅពីកើតមកលិចក្នុងល្បឿនលឿន រួចបុករថយន្តហាយឡែនឌ័រ ពីចំហៀងខាងស្ដាំពេញទំហឹង ធ្វើឲ្យរថយន្តហាយឡែនឌ័រ វិលទៅបុករបាំងដែកបាំងប្រឡាយលូទឹកស្អុយប៊ិះធ្លាក់ និងធ្វើឲ្យអ្នកជិះក្នុងរថយន្តភ័យគ្រប់គ្នា តែមិនបង្កឲ្យអ្នកណាម្នាក់រងរបួសនោះឡើយ ។
ក្រោយកើតហេតុភ្លាមៗ រថយន្តបង្ក បានបន្តបើកគេចបាត់ ទើបមួយសន្ទុះក្រោយ សមត្ថកិច្ចមូលដ្ឋានចុះមកដល់ ធ្វើការវាស់វែងយករថយន្តរងគ្រោះទៅរក្សាទុកបណ្ដោះ អាសន្ននិងឲ្យម្ចាស់រថយន្តរងគ្រោះទៅដាក់ពាក្យបណ្ដឹងនៅប៉ុស្ដិ៍នគរបាលរដ្ឋបាលបឹកកេងកងទី៣ ដើម្បីជួយស្វែងរកអ្នកបង្ក មកទទួលខុសត្រូវតាមច្បាប់ ៕
