បាត់ដំបង ៖

យោងព័ត៌មានបឋមពីសមត្ថកិច្ចបានឲ្យដឹងថា មានករណីគ្រោះថ្នាក់ដ៏រន្ធត់មួយ បានកើតឡើងរវាងរថយន្តនិងម៉ូតូ បណ្តាលឲ្យក្មេងសិស្សសាលា០១នាក់ស្លាប់ភ្លាម ៗ ។ 


គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង៧និង២០នាទី ថ្ងៃទី១៦ ខែសីហា ឆ្នាំ២០២៤ នៅលើផ្លូវជាតិលេខ៥ ចន្លោះ គ.ម 284-285 ស្ថិតក្នុងភូមិជំនីក ឃុំអន្លង់វិល ស្រុកសង្កែ ខេត្តបាត់ដំបង រវាងរថយន្តម៉ាកលុចសីស470 ពណ៌សំបកឳឡឹក ប្រភេទទេសចរណ៍ ពាក់ស្លាកលេខភ្នំពេញ 2N.9459 បើកបរដោយបុរស០១នាក់ ទិសដៅពីជើងទៅត្បូង ចំណែកម៉ូតូម៉ាក HONDA Nex  ធុនC125 ពណ៌ស ពាក់ស្លាកលេខ បាត់ដំបង 1AE.9503 បើកបរដោយក្មេងសិស្សសាលាម្នាក់ ឈ្មោះ លួត វិសាល ភេទប្រុស អាយុ១៧ឆ្នាំ រស់នៅភូមិទួលល្វៀង ឃុំអូរដំបង២ ស្រុកសង្កែ ខេត្តបាត់ដំបង ទិសដៅពីត្បូងទៅជើង។ លុះមកដល់ចំណុចកើតហេតុ បានបុកគ្នាពេញទំហឹង បណ្តាលឲ្យក្មេងសិស្សសាលាស្លាប់ភ្លាមៗ ។





ប្រភពសមត្ថកិច្ចដដែល បានបញ្ជាក់ថាបន្ទាប់ពីកើតហេតុភ្លាម ក៏ស្រាប់តែមានរថយន្ត ម៉ាក KIA ពណ៌ស ប្រភេទដឹកទំនិញធុនធ្ងន់មួយគ្រឿងពាក់ស្លាកលេខ បាត់ដំបង 3A.3723 ដឹកទឹកកកអនាម័យបេងភី បានជ្រុលទៅបុកពីក្រោយរថយន្ត លុចស៊ីស រួចរេចង្កូតធ្លាក់ប្រឡាយផងដែរ។ ក្រោយមក សមត្ថកិច្ចនគរបាលជំនាញ បានមកវាស់វែងធ្វើកំណត់ហេតុ យកមធ្យោបាយទាំងបីគ្រឿងទៅរក្សាទុក ចំណែកសាកសពត្រូវបានប្រគល់អោយក្រុមគ្រួសារយកទៅធ្វើបុណ្យតាមប្រពៃណី ៕