ក្រុមណាហ្គាវើលដ៍ បន្តរកបាន ៣ពិន្ទុបន្ថែមទៀត ក្នុងជំនួបសប្ដាហ៍ទី២ បន្ទាប់ពីយកឈ្នះក្រុមវិសាខា ក្នុងលទ្ធផល ១-០ នៅកីឡដ្ឋានព្រីនស៍ នៃពានរង្វាន់លីគកំពូលកម្ពុជា Cambodian Premier League រដូវកាល២០២៤-២៥ កាលពីល្ងាចថ្ងៃទី១៨ សីហា ២០២៤ ។
ស្របពេល ដែល១ប្រកួតកន្លងមករបស់ ណាហ្គាវើលដ៍ បានយកឈ្នះ គិរីវង់សុខសែនជ័យ ២-០ នៅកីឡដ្ឋានខេត្តកំពង់ស្ពឺ ប្រកួតសប្ដាហ៍ទី១។ ខណ:ក្រុមវិសាខា បានចាញ់ ២ប្រកួតជាប់គ្នា នៅដើមរដូវកាលថ្មីនេះ ដោយប្រកួតទី១ ចាញ់ភ្នំពេញក្រោយ ៤ទល់និង២ នៅសប្ដាហ៍ទី១ កន្លងទៅ ។
សម្រាប់លទ្ធផលនៃប្រកួត ៤គូ កាលពីថ្ងៃទី១៦ និងថ្ងៃទី១៧ សីហា ចុងសប្ភាហ៍កន្លងទៅនេះ ក្លិបបាល់ទាត់អាយអេសអាយ ដង្កោសែនជ័យ បានប្រកួតចាញ់ក្លិបបាល់ទាត់ព្រះខ័នរាជស្វាយរៀង ក្នុងលទ្ធផល ១ទល់និង៤ នៅកីឡាដ្ឋាន AIA KMH Park , ក្រុមគិរីវង់សុខសែនជ័យ ប្រកួតចាញ់ក្រុមបឹងកេត ក្នុងលទ្ធផល១ទល់និង២ នៅកីឡដ្ឋានគិរីវង់ ខេត្តតាកែវ, សមាគមកីឡាបាល់ទាត់កងយោធពលខេមរភូមិន្ទ ប្រកួតចាញ់ក្រុម ភ្នំពេញក្រោន ក្នុងលទ្ធផល ១ទល់និង២ នៅកីឡដ្ឋានស្ដាតចាស់ និងសមាគមកីឡាបាល់ទាត់ក្រសួងមហាផ្ទៃ ប្រកួតស្មើគ្នាជាមួយក្លិបបាល់ទាត់ឡាយហ្វ ខេត្តព្រះសីហនុ ក្នុងលទ្ធផល ១ទលនិង១ នៅកីឡាដ្ឋាន AIA KMH Park ។
ចំពោះពានរង្វាន់លីគកំពូលកម្ពុជា រដូវកាលឆ្នាំ២០២៤-២៥ នេះមានសមាជិកចំនួន១១ក្រុម ដោយប្រកួតប្រជែងពីថ្ងៃទី១០ ខែសីហា ឆ្នាំ២០២៤ ដល់ថ្ងៃទី១៧ ខែឧសភា ឆ្នាំ២០២៥ ខាងមុខ ដោយតម្រូវក្រុមជាសមាជិកប្រកួតវិលជុំសន្សំពិន្ទុចំនួន២ជើង ហើយក្រុមចំណាត់ថ្នាក់លេខ១ដល់លេខ៦ បន្តប្រកួតយកជើងឯក ខណៈក្រុមលេខ៧ ដល់១១ ត្រូវប្រកួតយកចំណាត់ថ្នាក់ ៕
