ខេត្តសៀមរាប ៖ 

នៅវេលាម៉ោង២០និង 00នាទី ថ្ងៃទី១៩ ខែសីហា ឆ្នាំ២០២៤ មានករណីគ្រោះថ្នាក់ចរាចរណ៍មួយកើតឡើង នៅតាមបណ្តោយផ្លូវក្រវាត់ក្រុងទី២ ត្រង់ចំណុចខាងត្បូងវត្តអរញ្ញរង្សី ស្ថិតក្នុងភូមិត្រពាំងទឹម ឃុំកណ្ដែក ស្រុកប្រាសាទបាគង ខេត្តសៀមរាប  ដោយបុរសម្នាក់សង្ស័យស្រវឹងស្រា បើកបររថយន្ត Mitsubishi Triton (មីតស៊ុប៊ីស៊ី ត្រាយថុន) ពណ៌ប្រាក់ ពាក់ផ្លាកលេខ ភ្នំពេញ 2BL-1800  បានរេចង្កូតបុកចូលផ្ទះបើកពិគ្រោះជម្ងឺទូទៅ យីហោ «វេជ្ជបណ្ឌិត មឿន ដារ៉ាវុធ» ស្ថិតក្នុងភូមិកើតហេតុ បានបណ្ដាលឲ្យមានរបួសមនុស្ស ២នាក់ និងម៉ូតូ ២គ្រឿង រងការខូចខាត ។  

ក្នុងពេលកំពុងកើតហេតុនោះដែរ ក៏មានជនមិនស្គាល់អត្តសញ្ញាណ បានធ្វើការជម្លៀសជនបង្ក ចេញពីកន្លែងកើតហេតុ តាមរថយន្តFord Raptor F150 ពណ៌ខ្មៅពាក់ផ្លាក លេខ ភ្នំពេញ 2BC-0055 ចេញទៅបាត់  ដោយជនបង្កនោះមានរងរបួសមុខទៀតផង ។ 

តាមប្រភពពីប្រជាណលរដ្ឋ បានឃើញហេតុការណ៍ក្នុងករណីគ្រោះថ្នាក់ចរាចរណ៍នេះ បានបញ្ជាក់ថា នៅវេលាដូចបានបញ្ជាក់ខាងលើ រថយន្តបង្ក បានបើកបរមកពីទិសខាងជើងទៅត្បូង  ពេលមកដល់ផ្លូវកោង ក៏បានរេចង្កូតទៅបុកប៉ះម៉ូតូ២គ្រឿង រួចបានទៅបុកជញ្ជាំងផ្ទះពិគ្រោះ និងពិនិត្យជម្ងឺ និង បណ្តាលឲ្យមានរបួសធ្ងន់ស្រាលពីរនាក់ទៀតផង ៕