រាជធានីភ្នំពេញ ៖
បុរសម្នាក់ជិះម៉ូតូ បោះពួយក្នុងល្បឿនលឿន បានរេចង្កូតជ្រុលទៅបុករ៉ឺម៉ក ដឹកផ្លែឈើ ពេញទំហឹង បណ្ដាលឲ្យបុរសខាងលើ ដួលបោកផ្ទប់និងដែករ៉ឺម៉ក ស្លាប់ភ្លាមៗ យ៉ាងរន្ធត់ បង្កឲ្យមានការភ្ញាក់ផ្អើលនៅវេលាម៉ោង៧យប់ ថ្ងៃព្រហស្បតិ៍ ទី១៥ ខែសីហា ឆ្នាំ២០២៤ នៅតាមបណ្ដោយផ្លូវ ព្រៃស ក្នុងសង្កាត់ពងទឹក ខណ្ឌដង្កោ រាជធានីភ្នំពេញ ។
បើតាមប្រភពព័ត៌មាន បានឲ្យដឹងថានៅមុនពេលកើតហេតុ គេបានឃើញបុរសម្នាក់ជិះ ម៉ូតូម៉ាក ហុងដា ឃ្លីក ពណ៌ខ្មៅ ពាក់ស្លាកលេខ ភ្នំពេញ1BH-3303 បោះពួយក្នុងល្បឿនលឿន ទិសដៅពីត្បូងទៅជើង លុះមកដល់ចំណុចកើតហេតុខាងលើ បានរេចង្កូតជ្រុលទៅបុករ៉ឺម៉កដឹកផ្លែឈើ ចំពីមុខយ៉ាងពេញទំហឹង បណ្ដាលឲ្យបោកផ្ទប់និងដែករ៉ឺម៉ក ស្លាប់ភ្លាមៗនៅនិងកន្លែង ចំណែកឯរ៉ឺម៉ក ខ្ទាតរេ ទៅប៉ះរថយន្តមួយគ្រឿងចតចោល រងការខូចខាត ក្រឡាប់ចាក់ផ្លែឈើ ពេញថ្នល់ ។
ក្រោយកើតហេតុខាងលើ សមត្ថកិច្ចមូលដ្ឋានសហការជាមួយជំនាញចរាចរណ៍ ចុះមកដល់វាស់វែងយកម៉ូតូរងគ្រោះនិង រ៉ឺម៉ក ទៅរក្សាទុកបណ្ដោះអាសន្ន រង់ចាំការដោះស្រាយនៅពេលក្រោយ ។ ដោយឡែក សពជនរងគ្រោះ សមត្ថកិច្ចធ្វើកំណត់ហេតុរួច បានប្រគល់ជូនក្រុមគ្រួសារយកទៅបុណ្យតាមប្រពៃណី ៕
