ជាការពិតណាស់ បន្ទាប់ពីបានបើកចំហរស្នេហាជាសាធារណៈរបស់កញ្ញា រឿន ណាត Miss Universe Cambodia 2018 និង លោក លាវ វេងហួរ Mister Friendship International 2023 កាលពីប៉ុន្មានខែមុននេះ សង្កេតឃើញថា គូស្នេហ៍ដ៏សាកសមមួយនេះ តែងតែទទួលបានឱកាសការងារជាដៃគូជានិច្ច ក្នុងនោះរួមមាន ការថតសម្អាងការ ការថតបែបFashion ការចូលរួមកម្មវិធីកម្សាន្តនៅតាមបណ្តាស្ថានីយទូរទស្សន៍នានាជាដើម។ មិនត្រឹមតែប៉ុណ្ណោះ ពួកគេថែមទាំងមានឱកាសបានសម្តែងខ្សែភាពយន្តខ្នាតធំជាមួយគ្នាទៀតផង នោះគឺរឿង “អ្នកម្តាយ Zombie” ហើយរឿងនេះទៀតសោតក៏បានថតចប់រួចរាល់និងកំពុងចាក់បញ្ចាំងនៅតាមបណ្តារោងកុននៅក្នុងប្រទេសកម្ពុជាផងដែរ។ បន្ទាប់ពីទទួលបានភាពជោគជ័យលើខ្សែភាពយន្តដែលបានថតរួមគ្នាជាលើកដំបូង កាលពីពេលថ្មីៗកន្លងទៅនេះ ពួកគេក៏បានទៅចូលរួមសម្ពោធការចាក់បញ្ចាំងខ្សែភាពយន្តខ្នាតធំរបស់ខ្លួននៅឯប្រទេសហ្វីលីពីន រួមជាមួយនឹងអ្នកនាង ប៊ុន ចាន់និមល ម្ចាស់ផលិតកម្មសាស្ត្រាហ្វីម។ ក្នុងដំណើរសម្ពោធការចាក់បញ្ចាំងរឿងនេះ ឃើញថាមានសន្ទុះនៃការគាំទ្រយ៉ាងច្រើនលើសលប់ពីសំណាក់បងប្អូនជនជាតិហ្វីលីពីនដែលស្រឡាញ់គាំទ្រមកលើពួកគេ។ ស្របពេលដែលមានការគាំទ្រដោយមិននឹកស្មានបែបនេះ កញ្ញា រឿន ណាត និងលោក លាវ វេងហួរ ក៏បានបញ្ចេញអារម្មណ៍ភ្ញាក់ផ្អើលនិងរំភើប ក៏ដូចជាការអរគុណ សម្រាប់ការស្វាគមន៍យ៉ាងកក់ក្តៅដល់វត្តមានរបស់ពួកគេថែមទៀតផង ។
យ៉ាងណាមិញ យោងតាមរយៈការបង្ហោះនៅក្នុង Story IG របស់លោក លាវ វេងហួរ បានឱ្យដឹងបន្ថែមទៀតថា បន្ទាប់ពីបញ្ចប់ការសម្ពោធរឿង “អ្នកម្តាយ Zombie” ពួកគេនឹងបន្តដំណើរទៅកាន់ប្រទេសសិង្ហបុរី មុននឹងធ្វើដំណើរវិលត្រលប់មកកាន់ប្រទេសកម្ពុជាវិញ ៕
