កាលពីថ្ងៃទី 26 ខែសីហា ឆ្នាំ2024 កន្លងទៅនេះ អតីតសមាជីកក្រុមច្រៀងកូរ៉េ EXO លោក ហួង ចឺតៅ (Huang Zi Tao) បានធ្វើការ Surprise នាង ស៊ូ អ៊ីយ៉ាង (Xu Yiyang) ដែលជាមិត្តស្រី សុំរៀបការនៅក្នុងកម្មវិធីដ៏ល្បីមួយរបស់ប្រទេសចិនដែលមានឈ្មោះថា “Dare or Not”។ អតីតសមាជិកក្រុមចម្រៀងកូរ៉េម្នាក់នេះ បាននាំ ស៊ូ អ៊ីយ៉ាង ដែលភ្នែកកំពុងបិទដោយក្រណាត់ពណ៌ផ្កាឈូក ដើរកាត់សួនផ្កាកុលាបពណ៌ផ្កាឈូកដ៏សែនរ៉ូមែនទិកនៅក្នុងកម្មវិធីទូរទស្សន៍នោះ។ ជាមួយគ្នានេះលោក ហួង ចឺតៅ (Huang Zi Tao) បានលត់ជង្គង់ និងនិយាយពាក្យក្នុងចិត្តទៅកាន់នាង ស៊ូ អ៊ីយ៉ាង (Xu Yiyang) យ៉ាងដូច្នេះថា៖ “ចាប់តាំងពីអូនបានចូលមកក្នុងជីវិតបង បងដឹងតែម្តងថាអូនគឺជាមនុស្សតែម្នាក់គត់ដែលនឹងរួមរស់ជាមួយគ្នារហូតដល់ថ្ងៃចុងក្រោយនៃជិវិត អូនគឺជាមនុស្សតែម្នាក់គត់ដែលបងនឹកគ្រប់វិនាទី បងចង់សុំអូនរៀបការជាមួយបង តើអូនហ៊ានឆ្លើយតបថាយល់ព្រមដែរឬទេ?” ភ្លាមនោះនាង ស៊ូ អ៊ីយ៉ាង (Xu Yiyang) ដែលជាមិត្តស្រីក៏បានឆ្លើយយល់ព្រមចំពោះសំណើរមិត្តប្រុសរបស់ខ្លួន ។

យ៉ាងណាមិញ  ស្ថិតនៅក្នុងបរិយាកាសនៃកម្មវិធី “Dare or Not” ដែលបានចាក់បញ្ចាំងកាលពីពេលថ្មីៗកន្លងមកនេះ ឃើញថាពោរពេញដោយភាពផ្អែមល្ហែមនិងមានអត្ថន័យ  ចំណែកឯបណ្តាអ្នកគាំទ្រនិងអ្នកទស្សនានៅតាមបណ្តាញសង្គមវិញ ក៏បានចូលរួមសម្តែងក្តីត្រេកអរយ៉ាងច្រើនលើសលប់ដល់ពួកគេទាំងពីរនាក់ផងដែរ ។