ពានរង្វាន់លីគកំពូល (Cambodian Premier League) រដូវកាលឆ្នាំ២០២៤-២៥ បានបញ្ចប់ការប្រកួតសប្តាហ៍ទី៤ ហើយដោយនៅថ្ងៃទី១៤ ខែកញ្ញា ឆ្នាំ២០២៤ ក្រុមម្ចាស់ផ្ទះវិសាខា បានប្រកួតឈ្នះ ក្រុមព្រៈខ័នរាជស្វាយរៀង ក្នុងលទ្ធផល ១ទល់និង០ នៅកីឡដ្ឋានព្រីនស៍,ក្រុមម្ចាស់ផ្ទះបឹងកេត បានប្រកួតចាញ់ក្រុមភ្ញៀវមកពីខេត្តកំពង់ស្ពឺ ណាហ្គាវើលដ៍ ក្នុងលទ្ធផល១ទល់និង៣ នៅពហុកីឡដ្ឋានជាតិអូឡាំពិក និងក្រុមម្ចាស់ផ្ទះសមាគមកីឡាបាល់ទាត់កងយោធពលខេមរភូមិន្ទ TIFFY ARMY FC បានប្រកួតឈ្នះ ក្រុម ឡាយហ៍ អេហ្វស៊ី ខេត្តព្រះសីហនុ ក្នុងលទ្ធផល៣ទល់និង២ នៅកីឡដ្ឋាន TIFFY ARMY STADIUM ។
ដោយឡែកនៅថ្ងៃទី១៥ ខែកញ្ញា ឆ្នាំ២០២៤ នេះក្រុមម្ចាស់ផ្ទះគិរីវង់សុខសែនជ័យ របូត៣ពិន្ទុ ក្រោយចាញ់ភ្នំពេញក្រោន ដោយលទ្ធផល ០ទល់និង៦ រីឯក្រុមអាយអេអាយ ដង្កោសែនជ័យ បានចាញ់ក្រុមភ្ញៀវអង្គរថាយហ្គឺរ នៅក្នុងដីខ្លួនឯងដោយលទ្ធផល០ទល់និង២ ។
គួរដឹងថា ពានរង្វាន់លីគកំពូលកម្ពុជា រដូវកាលឆ្នាំ២០២៤-២៥ នេះមានសមាជិកចំនួន១១ក្រុម ដោយប្រកួតប្រជែងពីថ្ងៃទី១០ ខែសីហា ឆ្នាំ២០២៤ ដល់ថ្ងៃទី១៧ ខែឧសភា ឆ្នាំ២០២៥ ខាងមុខ ដោយតម្រូវក្រុមជាសមាជិកប្រកួតវិលជុំសន្សំពិន្ទុចំនួន២ជើង ហើយក្រុមចំណាត់ថ្នាក់លេខ១ដល់លេខ៦ បន្តប្រកួតយកជើងឯក ខណៈក្រុមលេខ៧ ដល់១១ ត្រូវប្រកួតយកចំណាត់ថ្នាក់ ៕
