.png)
កម្មវិធីប្រកួតកីឡាប្រដាល់គុនខ្មែរប៉ុស្តិ៍លេខ៥ បានឈានមកដល់សប្តាហ៍ចុងក្រោយ នៃខែកញ្ញា ដែលមានចំនួន ៥គូប្រកួតជូនបងប្អូនទស្សនា ។ សម្រាប់គូទី១ កីឡាករ ឬទ្ធិ ទេវទត្ត បានយកឈ្នះពិន្ទុទៅលើកីឡាករ បាលហៈ ច័ន្ទរាជ ក្រោយតស៊ូគ្នាយ៉ាងស្វិតស្វាញពេញ ៣ទឹក ។
គូទី២ កីឡាករ ផានិត ចៅសុខ និង វៀរ ចំណាប់ បានប្តូរគ្នាទៅវិញទៅមកតាំងពីទឹកទី១ លុះចូលដល់ទឹកទី២ ស្រាប់តែកីឡាករ វៀរ ចំណាប់ អស់ខ្យល់ខ្លួនឯង ក៏សុំបោះបង់ការប្រកួតតែម្តង។ សម្រាប់គូទី៣ កីឡាករ មិត ចាន់ម៉ើយ បោះជង្គង់ចូលពេញៗទៅលើពោះទឹកកីឡាករ រិទ្ធី នឹមណូ រហូតដល់សន្លប់នៅត្រឹមទឹកទី២។
លុះចូលដល់គូទី៤ ជាគូមិត្តភាពអន្តរជាតិរវាងកីឡាករ ធន់ អៀនឡៃ ប្រកួតជាមួយកីឡាករអ៊ីរ៉ង់ Alan Ebrahimi ។ កីឡាករអ៊ីរ៉ង់ចេញធ្ងន់ៗល្អ ប៉ុន្តែមិនសូវជាចំគោលដៅប៉ុន្មានទេ ខណៈ អៀនឡៃ មានគ្រប់ទម្រង់ទាំងក្បាច់ ទាំងបច្ចេកទេសយ៉ាងស្អាតរហូតឈានដល់ទៅការផ្តួលកីឡាករអ៊ីរ៉ង់នៅទឹកទី២ តាមរយៈផ្លែកែងដ៏មុតស្រួចរបស់ខ្លួន ។
និងគូទី៥ ជាគូចុងក្រោយប្រចាំកម្មវិធី កីឡាករ ធា នុរាជ ប្រកួតជាមួយកីឡាករថៃ ដាវវិសេត ស.ផារ៉ាត។ កីឡាករទាំង២ វាយដោយបច្ចេកទេសដូចគ្នា ប៉ុន្តែខាងកីឡាករថៃ វាយចំគោលដៅល្អជាង។ ចប់ការប្រកួតចៅក្រមសម្រេចផ្តល់ជ័យជម្នះទៅឲ្យកីឡាករ ដាវវិសេត ស.ផារ៉ាត ។
សូមជម្រាបជូនថា កម្មវិធីគុនខ្មែរប៉ុស្តិ៍លេខ៥ ដំណើរការនៅវេលាម៉ោង ៦ល្ងាចថ្ងៃសៅរិ៍ជារៀងរាល់សប្តាហ៍ ដោយទទួលបានការឧបត្ថមធំពីក្រុមហ៊ុនទឹកបរិសុទ្ធ LYYON និងក្រុមហ៊ុនទឹកកកអនាម័យ EVA PREMIUM ICE ព្រមទាំងសហការឧបត្ថមដោយក្រុមហ៊ុន Colgate ផងដែរ។ ពុកម៉ែបងប្អូនដែលគាំទ្រវិស័យកីឡាប្រដាល់គុនខ្មែរអាចអញ្ជើញមកទស្សនាការប្រកួតផ្ទាល់នៅស្ទូឌីយ៉ូប្រដាល់ប៉ុស្តិ៍លេខ៥ ព្រែកកំពឹស ខណ្ឌដង្កោ ដោយគ្មានការលក់សំបុត្រឡើយ!
