រាជធានីភ្នំពេញ ៖

អតីតតារាចម្រៀង លោកមៃសុគន្ធ ត្រូវបានសមត្ថកិច្ចចាប់វាយខ្នោះ ភ្លាមៗ បន្ទាប់ពីរូបគេ មិនសហការជាមួយកម្លាំងសមត្ថកិច្ចដាក់គោលដៅត្រួតពិនិត្យអាវុធជាតិផ្ទុះនិងអាកុល រួចបើករថយន្តបុកប៉ារ៉ាស់ ព្យាយាមរត់គេច ត្រូវបានកម្លាំងសមត្ថកិច្ច បើករថយន្តសារ៉ែនប្រដេញពីក្រោយ រហូតមកដល់ចំណុចមុខវត្តទឹកថ្លា ជ្រុលទៅបុកកង់បី២គ្រឿង ហើយ រេចង្កូតទៅបុករបាំងថ្មពុះចែកទ្រូងផ្លូវបាក់ចំនួន៣កង់ ថែមទៀត។ 


ហេតុការណ៍ភ្ញាក់ផ្អើលខាងលើនេះដែរ បានកើតឡើងនាវេលាម៉ោង១២:២០នាទីរំលង អាធ្រាតឈានចូលថ្ងៃទី០៥ ខែកញ្ញា ឆ្នាំ២០២៤ ចំណុខមុខវត្តទឹកថ្លា តាមបណ្តោយផ្លូវ សហព័ន្ធរុស្សី ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ ។

តាមការបញ្ជាក់ពីសមត្ថកិច្ច បានឲ្យដឹងថានៅមុនពេលកើតហេតុ កម្លាំងសមត្ថកិច្ចចម្រុះ នៃអធិការដ្ឋាននគបាលខណ្ឌសែនសុខ បានដាក់គោលដៅចុះត្រួតពិនិត្យ អាវុធជាតិផ្ទុះនិងគ្រឿងស្រវឹងនៅចំណុចផ្សារបឹងបៃតង។ ពេលនោះដែរ ស្រាប់តែឃើញមានរថយន្តម៉ាកឡង់គ្រីស័រ ពណ៌ស មួយគ្រឿងពាក់ផ្លាកលេភ្នំពេញ2BW-6802 បើកបរដោយបុរសម្នាក់ដែលគេស្គាល់ថា ជាលោកមៃសុគន្ធ ទាំងស្ថានភាពស្រវឹង ។

ភ្លាមនោះដែរ សមត្ថកិច្ច ក៏បានហៅរថយន្តឲ្យឈប់អែបមកខាង ដើម្បីត្រួតពិនិត្យ បែរជា លោកមៃសុគន្ធ មិនព្រមសហការ បានបើករថយន្ត បំបុកប៉ារ៉ាស់គោលដៅត្រួតពិនិត្យរបស់សមត្ថកិច្ច ហើយ រត់គេចខ្លួន ។

ភ្លាមៗនោះដែរ សមត្ថកិច្ចបានបើករថយន្តសារ៉ែនប្រដេញពីក្រោយរហូតមកដល់ចំណុចមុខវត្តទឹកថ្លា ក៏រថយន្តលោកមៃសុគន្ធ ជ្រុលទៅបុកកង់បីឥណ្ឌាមួយគ្រឿង ពណ៌លឿង ពាក់ផ្លាកលេខ ភ្នំពេញ1FS-6768 បើកបរដោយបុរសម្នាក់នៅពីមុខស្របទិសគ្នា ចំពីក្រោយ ពេញទំហឹង រុញផ្ទប់ទៅចិញ្ចើមផ្លូវ ទៅបុកកង់ឥណ្ឌាមួយគ្រឿងទៀត ពណ៌ស ពាក់ផ្លាកលេខ កណ្តាល 1AK-3493 បើកដោយបុរសម្នាក់ក្នុងទិសដៅបញ្រ្ចាសផ្លូវពីកើតមកលិច រងការខូចខាតយ៉ាងដំណំ។ រថយន្តបង្ក មិនទាន់អស់ល្បឿន ជ្រុលទៅបុករបាំងថ្មបាក់ចំនួន៣ កង់បន្ថែមទៀត ទើបរថយន្តទៅមុខលែងរួច និងបណ្តាលឲ្យមានមនុស្ស៣នាក់រងរបួស្រាល ផងដែរ។  ចំណែកលោកម៉ៃសុគន្ធ ត្រូវបានកម្លាំងសមត្ថកិច្ចនៃអធិការដ្ឋាននគរបាលខណ្ឌសែនសុខ វាយខ្មោះ រួចយកទៅខណ្ឌដើម្បីសួរនាំបន្តនិងចាត់ការតាមនិតិវិធីច្បាប់ ៕