.png)
រាជធានីភ្នំពេញ ៖
ស្រ្តីម្នាក់ ជិះម៉ូតូចូលទិញឥវ៉ាន់ភ្លេចដកសោរម៉ូតូ ខណៈចេញមកវិញក៏បាត់ម៉ូតូ នៅលើផ្លូវវេងស្រេង ផ្អើលឆោរឡោរដល់សមត្ថកិច្ច ជួយមើលតាមប្រពន្ធជីភីអេស រកឃើញនៅផ្លូវរថភ្លើង ខណ្ឌដូនពេញ។ ហេតុការណ៍នេះ បង្កការភ្ញាក់ផ្អើលកាលពីវេលាម៉ោង១១និង៣០នាទីព្រឹកថ្ងៃទី១១ ខែកញ្ញា ឆ្នាំ២០២៤ នៅត្រង់ចំណុចផ្ទះលក់ឥវ៉ាន់ចាប់ហួយមួយកន្លែង តាមបណ្តោយផ្លូវ វេងស្រេង ស្ថិតក្នុងសង្កាត់ចោមចៅទី០២ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មានពីជនរងគ្រោះបានឲ្យដឹងថាមុនពេលកើតហេតុ គាត់បានជិះម៉ូតូមួយគ្រឿង ម៉ាក ហុងដាប៊ីត ពណ៌ក្រហមលាយស ពាក់ស្លាកលេខ ភ្នំពេញ 1JK-7644 ជិះម៉ូតូចេញពីការ គោលបំណងទិញឥវ៉ាន់ដើម្បីយកទៅផ្ទះ។ ខណៈមកដល់ផ្ទះលក់ឥវ៉ាន់ចាប់ហួយមួយកន្លែង លើផ្លូវវេងស្រេង ក្នុងសង្កាត់ចោមចៅទី០២ បានឈប់ទិញឥវ៉ាន់មួយចំនួនដើម្បីយកទៅផ្ទះ ។
ស្របពេលនោះដែរ ស្រ្តីរងគ្រោះបានចុះពីលើម៉ូតូ ដោយភ្លេចដកសោរចេញពីម៉ូតូ រួចដើរទៅទូទាត់ប្រាក់ឲ្យថ្លៃឥវ៉ាន់ ក៏ស្រាប់តែមានជនឆ្លៀតឱកាស បានឃើញធ្វើសកម្មភាពឡើងជិះរត់គេចខ្លួនតែម្តង។ ភ្លាមៗ ស្រ្តីរងគ្រោះ បានរាយការណ៍ជូនសមត្ថកិច្ច ជួយរក ម៉ូតូតាមប្រព័ន្ធជីភីអេស ប្រដេញរហូតមកដល់ផ្លូវរថភ្លើង ក្នុងសង្កាត់ស្រះចក ខណ្ឌដូនពេញ ទើបរកឃើញម៉ូតូវិញនៅខាងក្រោមតង់អានាធិបតេយ្យ ។ ចំណែកជនសង្ស័យបានរត់គេចខ្លួនបាត់តែម្តង ។
ក្រោយពេលកើតហេតុ សមត្ថកិច្ចមូលដ្ឋាន បានមកដល់ និង បានធ្វើកំណត់ហេតុ ប្រគល់សំណុំរឿងទៅកាន់សមត្ថកិច្ចប៉ុស្តិ៍ចោមចៅទី០២ ដែលជាម្ចាស់ករណី ដើម្បីនាំជនរងគ្រោះដាក់ពាក្យបណ្តឹង ស្រាវជ្រាវរកជនសង្ស័យ ចាត់ការតាមផ្លូវច្បាប់ ៕
