.png)
ប៉ៃលិន ៖
ម្នាក់ៗដែលធ្វើដំណើរតាមដងផ្លូវ នាំគ្នាព្រលឹងចុងសក់ ដោយឃើញជនជាតិចិន១ក្រុម បើករថយន្តក្នុងល្បឿនលឿនដូចហោះក្នុងទិសដៅពីកើតទៅលិច ដោយគេសង្ស័យថា ស្រវឹងស្រាជោគជាំ ។ លុះដល់ផ្លូវកោងឡើងទួល អ្នកបើកបរបួងចង្កូតមិនទាន់ ក៏ជ្រុលធ្លាក់ក្នុងប្រឡាយអត់ទឹក ក្រឡាប់ជាច្រើនត្រឡប់ បណ្តាលឱ្យរងរបួសធ្ងន់ស្រាលចំនួន៥នាក់ សុទ្ធតែជាជនជាតិចិន ។ ភ្លាមៗនោះ ត្រូវបានប្រជាពលរដ្ឋនាំគ្នាគាស់ទ្វាររថយន្តជួយដឹកយកទៅសង្គ្រោះនៅមន្ទីរពេទ្យបង្អែកខេត្តប៉ៃលិន។ តែដោយសារជនរងគ្រោះមួយចំនួនរងរបួសធ្ងន់ ត្រូវគេបញ្ជូនបន្តទៅមន្ទីរពេទ្យខេត្តបាត់ដំបង ។
ហេតុការណ៍ខាងលើនេះ បានកើតឡើងកាលពីរសៀលថ្ងៃទី១៧ ខែកញ្ញា ឆ្នាំ២០២៤ នៅតាមបណ្តោយផ្លូវជាតិលេខ៥៧ ត្រង់ចំណុចអង់តែនទូរស័ព្ទ០១៦ ស្ថិតនៅក្នុងភូមិអូររអិលព្រំប្រទល់ជាប់នឹងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
តាមប្រភពពីប្រជាពលរដ្ឋ ដែលឃើញហេតុការណ៍ខាងលើ បានឱ្យដឹងថា៖មុនពេលកើតហេតុ គេឃើញរថយន្តម៉ាក ឡង់គ្រីស័រ ពណ៌ស ពាក់ស្លាក់លេខ 2AV 8180 បើកបរដោយជនជាតិចិនម្នាក់ និងមានមនុស្សក្នុងរថយន្ត ចំនួន៥នាក់សុទ្ធតែប្រុសៗ ដោះអាវទាំងអស់គ្នា ដូចជាស្ថិតក្នុងសភាពស្រវឹងធ្លាក់ភ្នែក។ ប្រភពដដែល បន្តទៀតថា ពួកគេបើកបររថយន្តក្នុងល្បឿនយ៉ាងលឿន រេចង្កូតពេញផ្លូវ ធ្វើឱ្យម្នាក់ៗបើកបរគេចស្ទើរតែមិនទាន់។ លុះដល់ចំណុចផ្លូវកោងខាងលើ ស្រាប់តែបួងចង្កូចមិនទាន់ ក៍ជ្រុលទៅចំហៀងខាងស្តាំដៃ បណ្តាលឱ្យធ្លាក់ប្រឡាយអត់ទឹក ក្រឡាប់ជាច្រើនត្រឡប់ ខ្ទាតចេញពីកន្លែងកើតហេតុចំងាយប្រហែងជិត១០០មែត្រ ។
តែសំណាងល្អដែរមិនមានម៉ូតូ ឬរថយន្តនៅជិតឬក្បែរទីនោះទេ កុំអីអាចនឹងទទួលរងគ្រោះថ្នាក់ទាំងអស់តែម្តង។ ប្រភព បញ្ជាក់ថាជនជាតិចិនដែលនៅក្នុងរថយន្ត ត្រូវបានប្រជាពលរដ្ឋជួយគាស់ទ្វាររថយន្ត និងលើកដាក់លើរថយន្តសង្រ្គោះរបស់មន្ទីរពេទ្យបង្អែកខេត្ត ដើម្បីព្យាបាលដោយសារមានអ្នករងរបួសធ្ងន់ និងស្រាលផងដែរ ៕
