.png)
កីឡាករ ឃួន ឡាំងកូនស៊ីន និង សុភាព រុងរឿង ដែលចូលខ្លួនមកប្រកួតគូមិត្តភាពអន្តរជាតិនៅសង្វៀនគុនខ្មែរប៉ុស្តិ៍លេខ៥ កាលពីចុងសប្តាហ៍ ទទួលបានជ័យជម្នះដូចគ្នា ដោយ ឃួន ឡាំងកូស៊ីន ប្រកួតគូទី៤ ទម្ងន់៥៧គីឡូក្រាម ប្រើហ្គង់ចេញម្រាម បានទាត់ជើងកីឡាករម៉ារ៉ុក ឲ្យដួលក្រោកលែងរួច ក្រោយអាជ្ញាកណ្តាលរាប់គ្រប់១០ ក៏បញ្ឈប់នៅត្រឹមទឹកទី១ តែម្តង។ រីឯ សុភាព រុងរឿង ដែលចូលខ្លួនមកជំនួសលោក ឡឹក វិបុល នៅគូទី៥ ប្រចាំកម្មវិធី ក្នុងទម្ងន់ ៦៥គីឡូក្រាម ប្រើហ្គង់ធម្មតានោះ ក៏បានយកឈ្នះដោយពិន្ទុទៅលើកីឡាករឡាវ ស៊ីងស្យាម ស៊ីតសៀនអេព ផងដែរ ។
ក្រៅពី ២គូនេះ នៅមាន ៣គូទៀត ដោយគូទី១ បើកឆាកកម្មវិធីទម្ងន់ ៤៨គីឡូក្រាម ប្រើហ្គង់ធម្មតា កីឡាករ រិទ្ធី អ៊ីចយ ប្រកួតចាញ់ពិន្ទុកីឡាករ បាលហៈ ច័ន្ទរាជ ។ ចំណែកឯគូទី២ ទម្ងន់ ៥៤គីឡូក្រាម ប្រើហ្គង់ធម្មតា កីឡាករ សោម សុធន់ បានផ្តួលកីឡាករ វុទ្ធី វណ្ណដា ឲ្យបោះបង់ការប្រកួតនៅក្នុងទឹកទី៣ និងគូទី៣ លេងហ្គង់ចេញម្រាម ទម្ងន់ ៦៥គីឡូក្រាមរវាងកីឡាករ ជុន លីហូវ និង ឌុន រ៉ៃយ៉ា។ គូនេះមានទៅមានមកតាំងពីទឹកទី១ ខណៈកម្រិតសមត្ថភាព និងបច្ចេកទេសពិតជាត្រដំប្រសងគ្នាខ្លាំងបំផុត ទើបឆ្លងកាត់ការតស៊ូពេញ ៣ទឹក ចៅក្រមសម្រេចឲ្យស្មើគ្នាតែម្តង!
សូមបញ្ជាក់ថា កម្មវិធីគុនខ្មែរប៉ុស្តិ៍លេខ៥ ប្រកួតជូនបងប្អូនទស្សនានៅរៀងរាល់ថ្ងៃសៅរិ៍ម៉ោង ៦ល្ងាច នៅស្ទូឌីយ៉ូប្រដាល់ប៉ុស្តិ៍លេខ៥ ព្រែកកំពឹស ដោយបើកឲ្យបងប្អូនចូលទស្សនាបានដោយសេរី! កម្មវិធីអាចដំណើរទៅបានដោយទទួលបានឧបត្ថមពីក្រុមហ៊ុនទឹកកកអនាម័យ EVA Premium Ice និងទឹកបរិសុទ្ធ Lyyon ព្រមទាំងរួមសហការឧបត្ថមដោយក្រុមហ៊ុន Colgate ផងដែរ ៕
