.png)
ភ្នំពេញ ៖
បុរសជនបរទេសម្នាក់ បានរងរបួសធ្ងន់ត្រូវបានរថយន្តសាមុយនៃមន្ទីរពេទ្យ កាល់ម៉ែត្រ ដឹកទៅសង្គ្រោះបន្ទាន់ភ្លាមៗ ខណៈពេលបើកម៉ូតូលឿនខ្វះការប្រុងប្រយ័ត្នជ្រុលទៅពីក្រោយរថយន្ត ហាយឡែនឌ័រ កំពុងតែឈប់រង់ចាំស្តុប ។ គ្រោះថ្នាក់ចរាចរណ៍ខាងលើនេះដែរ បង្កការភ្ញាក់ផ្អើលកាលពីវេលាម៉ោងប្រមាណជា ១០និង១៥នាទី យប់ថ្ងៃទី១២ខែកញ្ញាឆ្នាំ ២០២៤ ចំណុចស្តុបក្តាន់ពីរ ស្ថិតនៅលើផ្លូវសហព័ន្ធរុស្ស៊ី សង្កាត់ស្រះចក ខណ្ឌដូនពេញ ។
តាមការបញ្ជាក់ពីកន្លែងកើតហេតុ បានឲ្យដឹងថានៅមុនពេលកើតហេតុ គេឃើញរថយន្ត ហាយឡែនឌ័រ ពណ៌ខ្មៅមួយគ្រឿងពាក់ផ្លាកលេខ ភ្នំពេញ 2W-0661 បើកបរដោយស្រ្តីម្នាក់ ធ្វើដំណើរតាមបណ្ដោយផ្លូវសហព័ន្ធរុស្ស៊ី ក្នុងទិសដៅពីកើតមកលិច ខណ:ពេលធ្វើដំណើរមកដល់ចំណុចកើតហេតុខាងលើ បានឈប់រង់ចាំស្តុបក្រហម ។
ភ្លាមនោះដែរ ស្រាប់តែគេឃើញបុរសជនបរទេសម្នាក់ បានបើកម៉ូតូម៉ាក ធូដេ ពណ៌ខ្មៅមួយគ្រឿង ពាក់ផ្លាកលេខ ភ្នំពេញ 1GN-5354 ធ្វើដំណើរមកពីក្រោយស្របទិសគ្នាពីកើតមកលិចក្នុងល្បឿនយ៉ាងលឿន។ ខណ:មកដល់ចំណុចកើតហេតុ ក៏ជ្រុលទៅបុកផ្ទប់ពីក្រោយរថយន្ត ហាយឡែនឌ័រ ពេញទំហឹង បណ្ដាលឲ្យរថយន្តបែកកញ្ចក់ រងការខូចខាត ។ ចំណែកឯបុរសជាជនបរទេសវិញ បានរងរបួសធ្ងន់ត្រូវបានរថយន្តសាមុយដឹកទៅសង្រ្គោះបន្ទាន់ភ្លាមៗផងដែរ ។
ក្រោយកើតហេតុ សមត្ថកិច្ចមូលដ្ឋានសហការជាមួយជំនាញចរាចរណ៍ចុះមកដល់វាស់វែង យករថយន្តនិងម៉ូតូទៅរក្សាទុកជាបណ្តោះអាសន្ន រង់ចាំភាគីសងខាងសម្រួលគ្នានៅពេលក្រោយ ៕
