ខេត្តឧត្តរមានជ័យ ៖

មនុស្សចំនួន៣នាក់ បានរងរបួសធ្ងន់ស្រាលក្នុងនោះមានក្មេងម្នាក់ នៅក្នុងគ្រោះថ្នាក់ចរាចរណ៍មួយ បង្កឡើងដោយរថយន្តតូយ៉ូតា ហាយឡិនឌ័រ ពណ៌ទឹកមាស ១គ្រឿង ពាក់ស្លាកលេខ ភ្នំពេញ 2Z.2762 បើកបរយ៉ាងលឿនបុករះចូលផ្ទះអ្នកលក់ចាប់ហួយ អស់ជាច្រើនតូប ។

ករណីគ្រោះថ្នាក់ចរាចរណ៍នេះបានកើតឡើងនៅលើផ្លូវជាតិលេខ៦៨ ស្ថិតនៅក្នុងភូមិផ្អុង សង្កាត់កូនក្រៀល ក្រុងសំរោង ខេត្តឧត្តរមានជ័យ នៅវេលាម៉ោងប្រមាណជា ១រសៀលថ្ងៃទី១១ ខែកញ្ញា ឆ្នាំ២០២៤ ។ យោងតាមប្រភពពីអ្នកដែលឃើញហេតុការណ៍ម្នាក់ បានរៀបរាប់ប្រាប់ថា មុនពេលកើតហេតុ គាត់បានឃើញរថយន្តនោះ បើកយ៉ាងលឿនស្លេវ ក្រោយមក ក៏បានបុកចូលផ្ទះលក់អីវ៉ាន់ចាប់ហួយរបស់គាត់ បណ្តាលឲ្យចៅស្រីរបស់គាត់រងរបួសធ្ងន់ធ្ងរនិងខូចខាត របស់របរ ដូចជា ប្រភូមិ ទូរក្លាស់សេ ព្រមទាំងអីវ៉ាន់ក្នុងតូបជាច្រើនមុខផ្សេងៗទៀត ។

ក្រោយកើតហេតុភ្លាម បងប្អូនអ្នកភូមិ បានហៅទូរស័ព្ទទៅប្រាប់សមត្ថកិច្ចនិងហៅរថយន្តពេទ្យ មកជួយអន្តរាគមន៍ដឹកអ្នករបួសទៅកាន់មន្ទីរពេទ្យ។ បន្ទាប់មកទៀត ក៏ឃើញមាននគរបាលប៉ុស្តិ៍សង្កាត់កូនក្រៀល និងសមត្ថកិច្ចជំនាញចរាចរណ៍ក្រុងសំរោង ចុះមកដល់កន្លែងកើតហេតុ ធ្វើការត្រួតពិនិត្យជាក់ស្តែង រួចបានស្ទូចយករថយន្តបង្កហេតុ យកមករក្សាទុកដើម្បីដោះស្រាយតាមនីតិវិធី ៕