ព្រឹត្តិការណ៍ Gumball 3000 ចាប់ផ្តើមហើយ ព្រមទាំងទទួលបានការគាំទ្រយ៉ាងច្រើនកុរករ

ព្រឹត្តិការណ៍ Gumball 3000 Rally in Cambodia ចាប់ផ្តើមនៅវេលាម៉ោង ២រសៀល ថ្ងៃទី១៥ ខែកញ្ញា នៅទីតាំងរៀបចំកម្មវិធីបរិវេណសួនច្បារវត្តបទុមវតី ។ ហើយចំពោះកម្មវិធី Gumball 3000 ដែលប្រមូលផ្ដុំដោយកំពូលរថយន្តលំដាប់ថ្លៃៗ និងទំនើបៗលើពិភពលោក នឹងត្រូវរៀបចំឡើងក្នុងប្រទេសកម្ពុជា ពីថ្ងៃទី១៥ ដល់ ១៧ ខែកញ្ញា ឆ្នាំ២០២៤ ។

មុនពេលធ្វើដំណើរមកដល់កម្ពុជា Gumball 3000 បានតាំងបង្ហាញរថយន្តទំនើបៗទាំងនេះ នៅក្នុងប្រទេសវៀតណាម នាថ្ងៃទី១៤ ខែកញ្ញា។ រដ្ឋបាលរាជធានីភ្នំពេញ បានឱ្យដឹងថា ការតាំងបង្ហាញក្បួនរថយន្ត ប្រមាណ ៣០០គ្រឿង នៅជុំវិញវិមានឯករាជ្យ នឹងមិនអនុញ្ញាតឱ្យយានយន្តគ្រប់ប្រភេទ ធ្វើដំណើរឆ្លងកាត់ទីតាំងនោះ រយៈពេល ២ ម៉ោងជាបណ្តោះអាសន្ន ចាប់ពីម៉ោង ២ រសៀល ដល់ម៉ោង ៤ ល្ងាច ។

ក្រោយចប់កម្មវិធីនេះ ក៏មានការតាំងបង្ហាញក្បួនរថយន្តគណៈប្រតិភូ Gumball 3000 និងរថយន្តមហាជនគាំទ្រក្នុងស្រុកបន្តទៀត ចាប់ពីម៉ោង ៥:៣០ នាទីដល់ម៉ោង ៨:៣យប់ ។ ការតាំងបង្ហាញនេះនៅលើកំណាត់មហាវិថីព្រះសីហនុ កំណាត់មហាវិថីព្រះសុរាម្រិត និងកំណាត់មហាវិថីសម្តេចសុធារស ដោយមិនអនុញ្ញាតឱ្យមានចរាចផងដែរ ។ ជាមួយគ្នានេះ ក៏នឹងមានការប្រគំតន្រ្តីជាតិ អន្តរជាតិ នៅសួនច្បារមុខវត្តបទុមវតី និងតាំងបង្ហាញក្បួនរថយន្តតាមកំណាត់មហាវិថីព្រះសីហនុ និងកំណាត់មហាវិថីព្រះសុរាម្រឹត ចាប់ពីម៉ោង៨៖៣០នាទី ដល់ម៉ោង១២យប់ទៀតផង ។ 

ក្រោយពេលតាំងបង្ហាញរថយន្តទំនើបៗរបស់កម្មវិធី Gumball 3000 ក្នុងរាជធានីភ្នំពេញនេះរួច ក្បួនរថយន្ត នឹងបន្តដំណើរឆ្ពោះទៅកាន់ខេត្តសៀមរាប នាថ្ងៃទី១៦ ខែកញ្ញា ដើម្បីតាំងបង្ហាញរថយន្ត ហើយថែមទាំងមានការបំបែកកំណត់ត្រា Guinness World Record នៃវត្តមានរថយន្តទំនើបច្រើនបំផុត នៅពីមុខប្រាសាទអង្គរ ។ នៅថ្ងៃទី១៧ ខែកញ្ញា កម្មវិធី Gumball 30០ បញ្ចប់បេសកកម្មក្នុងប្រទេសកម្ពុជា ហើយនឹងធ្វើដំណើរឆ្ពោះទៅកាន់ច្រកទ្វារប៉ោយប៉ែត ខេត្តបន្ទាយមានជ័យ ដើម្បីទៅធ្វើព្រឹត្តិការណ៍នេះ ក្នុងប្រទេសថៃបន្តទៀត ៕