លោក Li Jun បានក្លាយជាគ្រូបង្វឹកទទួលបានជោគជ័យបំផុតក្នុងវិស័យកីឡាបាល់ទះកម្ពុជា បន្ទាប់ពីលោកបានដឹកនាំក្រុមបាល់ទះជម្រើសជាតិកម្ពុជាតាំងពីឆ្នាំ២០១៨។ក្រោមការដឹកនាំរបស់គ្រូបង្វឹកជនជាតិចិនរូបនេះ ក្រុមបាល់ទះជម្រើសជាតិកម្ពុជាបង្ហាញគុណផលដ៏ល្អក្នុងការប្រកួតកម្រិតអាស៊ាននាប៉ុន្មានឆ្នាំចុងក្រោយ។ ក្រុមជម្រើសជាតិបានយកឈ្នះក្រុមដែលកម្ពុជាមិនធ្លាប់ឈ្នះពីមុនស្ទើរអស់ហើយក្នុងនោះថៃ ហ្វីលីពីន ម៉ាឡេស៊ី សិង្ហបុរី និងវៀតណាម ប៉ុន្តែនៅតែជម្រើសជាតិឥណ្ឌូណេស៊ីមួយគត់ក្នុងតំបន់ដែលកម្ពុជាមិនធ្លាប់ឈ្នះ ។ នៅចាំបានថាកាលពីស៊ីហ្គេម ឆ្នាំ២០១៩ នៅប្រទេសហ្វីលីពីន ក្រុមបាល់ទះជម្រើសជាតិកម្ពុជាស្ថិតក្រោមដឹកនាំរបស់លោក Li Jun បានបញ្ចប់នៅចំណាត់ថ្នាក់លេខ៣ក្នុងពូល បន្ទាប់ពីបានឈ្នះ វៀតណាម ៣-២ ប៉ុន្តែចាញ់ឥណ្ឌូណេស៊ី និង ហ្វីលីពីន ០-៣ ដូចគ្នា ។
ពីរឆ្នាំក្រោយមកពោលគឺកីឡាស៊ីហ្គេម ឆ្នាំ២០២១ ដែលលើកមកឆ្នាំ២០២២ ដោយសារវិបត្តិកូវីដ-១៩ កម្ពុជា បានយកឈ្នះ ហ្វីលីពីន ដោយលទ្ធផល ៣-១ និងចាញ់ថៃ ២-៣ ដើម្បីឈរលេខ២ក្នុងពូលបានឡើងទៅកាន់វគ្គពាក់កណ្តាលផ្តាច់ព្រ័ត្រជាលើកដំបូងក្នុងកីឡាស៊ីហ្គេម។ នៅវគ្គពាក់កណ្តាលផ្តាច់ព្រ័ត្រ កម្ពុជា បានចាញ់ ឥណ្ឌូណេស៊ី ១-៣ ដែលធ្លាក់ទៅដណ្តើមមេដាយសំរិទ្ធប៉ះថៃជាថ្មី។ កម្ពុជាបានបង្កការភ្ញាក់ផ្អើលដោយបានយកឈ្នះថៃដោយលទ្ធផល ៣-២ ដែលបានក្លាយជាប្រវត្តិសាស្ត្រឈ្នះថៃជាលើកដំបូង ហើយក៏ជាការឈ្នះមេដាយសំរិទ្ធក្នុងកីឡាស៊ីហ្គេម លើកដំបូងដែរក្នុងរយៈពេលប្រមាណ៥០ឆ្នាំចុងក្រោយ ។
ក្រឡេកមកមើលកាលពីកីឡាស៊ីហ្គេម ឆ្នាំ២០២៣ កម្ពុជារឹតតែបង្កការភ្ញាក់ផ្អើល ដោយបានយកឈ្នះសិង្ហបុរី ៣-០, ឈ្នះ ហ្វីលីពីន ៣-០ និងចាញ់ឥណ្ឌូណេស៊ី ០-៣ ដើម្បីឈរលេខ២ក្នុងពូល បានឡើងទៅកាន់វគ្គពាក់កណ្តាលផ្តាច់ព្រ័ត្រ។ នៅវគ្គពាក់កណ្តាលផ្តាច់ព្រ័ត្រ កម្ពុជា បានយកឈ្នះ ថៃ ដោយលទ្ធផល ៣-២ ដើម្បីបង្កើតប្រវត្តិសាស្ត្រឡើងទៅកាន់វគ្គផ្តាច់ព្រ័ត្រជាលើកដំបូង និងទទួលបានមេដាយប្រាក់កីឡាស៊ីហ្គេម ជាលើកដំបូង បន្ទាប់ពីចាញ់ឥណ្ឌូណេស៊ី ០-៣ នៅវគ្គផ្តាច់ព្រ័ត្រ ។
ឆ្នាំ២០២៤ ក្រុមបាល់ទះជម្រើសជាតិកម្ពុជាបានបោះជំហានទៅកាន់កម្រិត SEA V. League ឆ្នាំ២០២៥ បន្ទាប់ពីទទួលបានជោគជ័យក្នុងការប្រកួតពានរង្វាន់ SEA V. League Challenge ឆ្នាំ២០២៤។ ការប្រកួតទី១ កម្ពុជា បានឈ្នះ ម៉ាឡេស៊ី ៣-១, ប្រកួតទី២ឈ្នះ ឡាវ ៣-០ និងប្រកួតទី៣ ឈ្នះ សិង្ហបុរី ៣-១ ដើម្បីទទួលបានពិន្ទុច្រើនជាងគេក្នុងការឡើងទៅកម្រិតទី១នៅឆ្នាំក្រោយ ។
មិនត្រឹមតែប៉ុណ្ណោះ កម្ពុជាបានឈ្នះពានរង្វាន់សម្តេចធិបតី SEA V. League Challenge ឆ្នាំ២០២៤ បន្ទាប់ពីឈ្នះឡាវ ៣-០ នៅវគ្គពាក់កណ្តាលផ្តាច់ព្រ័ត្រ និងឈ្នះ ម៉ាឡេស៊ី ៣-០ នៅវគ្គផ្តាច់ព្រ័ត្រដើម្បីក្លាយជាជើងឯកដែលមានប្រាក់រង្វាន់១០០លានរៀល ។
សូមបញ្ជាក់ថា ពានរង្វាន់អាស៊ានលំដាប់ទី១ SEA V. League ឆ្នាំ២០២៥ មាន ថៃ ឥណ្ឌូណេស៊ី ហ្វីលីពីន និងកម្ពុជា ខណៈពានរង្វាន់លំដាប់ទី២មាន វៀតណាម ម៉ាឡេស៊ី សិង្ហបុរី និងឡាវ។ នៅឆ្នាំ២០២៥ ក្រុមអាស៊ានក៏ត្រូវប្រជែងគ្នាដណ្តើមមេដាយកីឡាស៊ីហ្គេម នៅប្រទេសថៃ។ ចំពោះសមិទ្ធផលសំខាន់ៗរបស់លោកគ្រូ Li Jun សម្រាប់ក្រុមជម្រើសជាតិកម្ពុជាទី១ ឈ្នះមេដាយសំរិទ្ធ កីឡាស៊ីហ្គេម ឆ្នាំ២០២១,ទី២ ឈ្នះមេដាយប្រាក់ កីឡាស៊ីហ្គេម ឆ្នាំ២០២៣ ទី៣ ឈ្នះជើងឯក SEA V. League Challenge Cup ឆ្នាំ២០២៤ ទី៤ កម្ពុជាឡើងទៅពានរង្វាន់ SEA V. League នៅឆ្នាំ២០២៥ និងទី៥ ការឈ្នះក្រុមជម្រើសជាតិមួយចំនួននៅតំបន់អាស៊ាន ។
