កាលពីល្ងាចថ្ងៃទី 18 ខែកញ្ញា កន្លងទៅនេះ តារាសម្តែង និងចម្រៀង លោក ឆឹម សក្កដា បានបញ្ចេញវីដអូចម្រៀងថ្មីមួយក្រោមចំណងជើងថា “Welcome To Cambodia” ដោយមានការផ្សារភ្ជាប់ជាមួយសិល្បៈបុរាណខ្មែរជាច្រើនទម្រង់ និងបានផ្តិតយកទេសភាពស្អាតៗជាច្រើនកន្លែងនៅក្នុងប្រទេសកម្ពុជាដាក់បញ្ចូលនៅក្នុងវីដេអូចម្រៀងមួយនេះផងដែរ។ មិនត្រឹមតែប៉ុណ្ណោះ សិល្បករ សិល្បការិនីល្បីៗជាច្រើនរូប ក៏បានបង្ហាញវត្តមាននៅក្នុងវីដេអូចម្រៀងដ៏មានគុណតម្លៃនេះផងដែរ ។
តាមរយៈវីដេអូចម្រៀងនេះ លោក ឆឹម សក្កដា ក៏បានបង្ហាញឱ្យដឹងផងដែរថា ផលិតឡើងមកក្នុងគោលបំណងចូលរួមផ្សព្វផ្សាយដើម្បីសិល្បៈវប្បធម៌ខ្មែរ និងជំរុញវិស្ស័យទេសចរណ៍នៅក្នុងកម្ពុជា។ ជាមួយគ្នានេះ នៅលើទំព័រហ្វេសបុកផ្លូវការរបស់ សម្តេចអគ្គមហាសេនាបតីតេជោ ហ៊ុន សែន ក៏បានបង្ហោះនូវវីដេអូបទចម្រៀងមួយនេះ អមជាមួយប្រសាសន៍យ៉ាងមានអត្ថន័យដូច្នេះថា “អរគុណចំពោះសិល្បករ សិល្បការិនីដែលខិតខំផលិតនូវស្នាដៃបទចំរៀងបង្ហាញអំពីសិល្បៈ វប្បធម៌ខ្មែរ ដើម្បីផ្សព្វផ្សាយទាក់ទាញភ្ញៀវទេសចរណ៍ នានា អោយចាប់អារម្មណ៍ និងធ្វើដំណើរមកកំសាន្តនៅកម្ពុជា ។ យើងត្រូវរួមគ្នាថែវប្បធម៌ដូនតា ព្រោះជាមរតកថ្លៃថ្លាសំរាប់មនុស្សជំនាន់ក្រោយ ។”
យ៉ាងណាមិញ វីដេអូចម្រៀង “Welcome To Cambodia” បន្ទាប់ពីបានធ្វើការផ្សព្វផ្សាយរួច មានមហាជនជាច្រើនបានចូលទៅសាទរចំពោះបទចម្រៀងដ៏មានមោទកភាពមួយនេះ តាមរយៈការចូលទៅបញ្ចេញមតិ និងធ្វើការចែករំលែកយ៉ាងច្រើនកុះករផងដែរ ៕
