បន្ទាយមានជ័យ ៖

កម្លាំងកងរាជអាវុធហត្ថក្រុងប៉ោយប៉ែត ឃាត់ខ្លួនជនសង្ស័យលួចម៉ូតូម្នាក់ នាំទៅចង្អុលកន្លែងបញ្ចាំនិងទិញផលចោរកម្ម ដកហូតបានម៉ូតូ៣១ និងកង់បី១ គ្រឿង ហើយ ជនសង្ស័យ ត្រូវបានបញ្ជូនទៅសាលាដំបូងខេត្តបន្ទាយមានជ័យ ចាត់ការបន្ត នៅរសៀលថ្ងៃទី១៦ ខែតុលាឆ្នាំ២០២៤ ។ ជនសង្ស័យលួច មានឈ្មោះ ខន ដាវ ភេទប្រុស អាយុ១៨ឆ្នាំ រស់នៅភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ។

លោកវរៈសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានឲ្យដឹងថា៖ក្រោយទទួលពាក្យបណ្តឹងឈ្មោះ ស៊ុន សៀវអេង ភេទស្រី អាយុ៣៧ឆ្នាំរស់នៅភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត បានប្តឹងជនសង្ស័យថាធ្វើសកម្មភាពលួចម៉ូតូម៉ាកស៊ូម័រ១គ្រឿង កាលពីថ្ងៃទី១៥ ខែតុលាឆ្នាំ២០២៤ នៅចំណុចភូមិ សាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ។

ក្រោយទទួលពាក្យបណ្តឹងភ្លាមៗ លោកវរៈសេនីយ៍ត្រី នួន នីណារ៉ូ បានដឹកនាំកម្លាំងមូលដ្ឋាននកងរាជអាវុធហត្ថក្រុងប៉ោយប៉ែត ស្រាវជ្រាវកំណត់មុខសញ្ញាឃាត់ខ្លួនជនសង្ស័យភ្លាមៗ ហើយ តាមចម្លើយសារភាព ជនសង្ស័យ បានយកទៅលក់ កន្លែងទទួលទិញនិងបញ្ចាំផលចោរកម្ម មួយកន្លែង។ ក្រោយមក កម្លាំងបានចុះទៅឆែកឆេរ ដកហូតម៉ូតូចំនួន៣១គ្រឿង និងម៉ូតូកង់បីចំនួន១គ្រឿង នៅមណ្ឌលបួន ភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត ប៉ុន្តែម្ចាស់ទីតាំងបានគេចខ្លួនបាត់ ។

ចំពោះម៉ូតូ ៣១គ្រឿង និងម៉ូតូកង់បីចំនួន១គ្រឿងដែលសមត្ថកិច្ចដកហូត ត្រូវបានយកមករក្សាទុកនៅទីបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត ដើម្បីឲ្យម្ចាស់ម៉ូតូ និងម៉ូតូកង់បី ដែលបាត់ យកឯកសារមកបញ្ជាក់អាជ្ញាធរមូលដ្ឋាន ដើម្បីយកម៉ូតូទៅវិញ ៕