ស្ត្រីម្នាក់ បានស្លាប់ភ្លាមៗ ក្រោយជួបឧបទ្ទវហេតុគ្រោះថ្នាក់ចរាចរណ៍ជិះម៉ូតូទៅបុកជាមួយរថយន្ត

ខេត្តបាត់ដំបង ៖ 

ស្ត្រីម្នាក់បានស្លាប់ភ្លាមៗ ក្រោយជួបឧបទ្ទវហេតុគ្រោះថ្នាក់ចរាចរណ៍ជិះម៉ូតូទៅបុកជាមួយរថយន្តកាលពីវេលាម៉ោង១៥និង១៥នាទីរសៀល ថ្ងៃទី២៦ ខែវិច្ឆិកា ឆ្នាំ២០២៤ នៅចំណុចភូមិផ្លូវមាស ឃុំផ្លូវមាស ស្រុករតនមណ្ឌល ខេត្តបាត់ដំបង ។

ប្រភពនៅកន្លែងកើតហេតុ ម៉ូតូម៉ាកហុងដាឌ្រីម ពណ៌ខ្មៅ ពាក់ផ្លាកលេខ បាត់ដំបង1AL-6315 បើកបរដោយឈ្មោះ ផល ចាន់ធួន ភេទស្រី អាយុ១៩ឆ្នាំ ទិសដៅពីជើងទៅត្បូង ចំណែករថយន្តម៉ាក Camry hybrid ពាក់ផ្លាកលេខចង្កូតស្តាំ BMC-0391 បើកបរដោយបុរសម្នាក់ទិសដៅពីត្បូងទៅជើង លុះដល់កន្លែងកើតហេតុបានជ្រុលបុកគ្នាពេញទំហឹងប៉ើងធ្លាក់ចូលប្រឡាយបណ្តាលអោយស្ត្រីខាងលើស្លាប់នៅកន្លែងកើតហេតុ ចំណែកអ្នកបើកបររថយន្តរងរបួសបែកមុខត្រូវបានគេមករំដោះយកគេចខ្លួនភ្លាមៗផងដែរ ។

ក្រោយពេលកើតហេតុ សមត្ថកិច្ចជំនាញ បានចុះទៅវាស់វែងធ្វើកំណត់ហេតុប្រគល់សពអោយខាងសាច់ញាតិយកទៅរៀបចំធ្វើបុណ្យតាមប្រពៃណី ចំណែកមធ្យោបាយទាំងពីរយកទៅរក្សាទុកនៅការិយាល័យជំនាញដើម្បីរងចាំដោះស្រាយតាមផ្លូវច្បាប់ ៕