សិស្ស២នាក់ជិះម៉ូតូបុកពីក្រោយរថយន្តចតស្ងៀម ដួលវ័ធត្រូវម៉ូតូ១គ្រឿងទៀត ដួល រងរបួសធ្ងន់និងស្រាល ៣នាក់

រាជធានីភ្នំពេញ ៖ 

សិស្សសាលា២នាក់ បានម៉ូតូម៉ាក ហុងដាស្កូបពី ១គ្រឿង ជ្រុលទៅបុកពីក្រោយរថយន្តហ្វត១គ្រឿង ដែលកំពុងឈប់ចតស្ងៀមលើផ្លូវ បណ្ដាលឲ្យដួលវ័ធត្រូវម៉ូតូស៊ុយហ៊្សុយគីស្មាស់១គ្រឿងទៀតដួល។ ខណៈនោះ បានបណ្ដាលឲ្យសិស្សម្នាក់របួសធ្ងន់ ត្រូវបានក្រុមសង្រ្គោះអង្គភាព៧១១ ដឹកបញ្ជូនទៅកាន់មន្ទីរពេទ្យគន្ធបុប្ផា និងម្នាក់ទៀត របួសស្រាល ចំណែកបុរសអ្នកជិះម៉ូតូស្មាស់ របួសស្រាលដែរ ។

ហេតុការណ៍នេះ បានកើតឡើងកាលពីវេលាម៉ោង៨និង១៥នាទីព្រឹកថ្ងៃទី១២ ខែវិច្ឆិកា ឆ្នាំ២០២៤ នៅតាមផ្លូវរណបផ្លូវជាតិលេខ៤ ភូមិថ្នល់បំបែក សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។

តាមប្រភពពីកន្លែងកើតហេតុ បានឲ្យដឹងថានៅវេលាកើតហេតុ មានសិស្សសាលា២នាក់ជិះម៉ូតូម៉ាកហុងដាស្កូបពី ពណ៌ស ពាក់ស្លាកលេខភ្នំពេញ1KF-7460 ធ្វើដំណើរក្នុងល្បឿនលឿនពីលិចទៅកើត ។ លុះពេលទៅដល់ត្រង់ចំណុចកើតហេតុ បានជ្រុលទៅបុកពីក្រោយរថយន្តម៉ាកហ្វត១គ្រឿង ពណ៌ស ពាក់ស្លាកលេខភ្នំពេញ2CB-4166 ឈប់ចតនៅលើផ្លូវនោះពេញទំហឹង ។ 

ប្រភពដដែល បានឲ្យដឹងបន្តថា ខណៈនោះ ម៉ូតូស្កូបពី នេះ បានដួលវ័ធត្រូវម៉ូតូ១គ្រឿងទៀត ម៉ាកស៊ុយហ៊្សុយគីស្មាស់ ពណ៌ខ្មៅ ពាក់ស្លាកលេខកំពង់ឆ្នាំ1C-6825 ដែលបើកបរដោយបុរសម្នាក់កំពុងធ្វើរដំណើរស្របគ្នា បណ្ដាលឲ្យដួលបោកទៅលើផ្លូវដែរ ។ ក្រោយពេលកើតហេតុ គេបានឃើញសិស្សសាលាម្នាក់ដែលជាអ្នកឌុបបានរងរបួសធ្ងន់ និងម្នាក់ទៀតជិះពីក្រោយ របួសស្រាល ចំណែកបុរសដែលជាអ្នកជិះម៉ូតូស្មាស់ ក៏រងរបួសស្រាល ផងដែរ ៕