នាយរងការិយាល័យផ្សព្វផ្សាយនៃស្នងការដ្ឋាននគរបាល ម្នាក់ស្លាប់បាត់បង់ជីវិត បន្ទាប់ពីបើកបរម៉ូតូខ្វះការប្រុងប្រយ័ត្ន ជ្រុលបុករថយន្តហ៊ីយ៉ាន់ដាយ

ខេត្តសៀមរាប ៖ 

នៅវេលាម៉ោង១៦ និង ១០នាទី រសៀលថ្ងៃទី២៤ ខែវិច្ឆិកា ឆ្នាំ២០២៤  នៅលើផ្លូវតេជោសន្តិភាព (ផ្លូវវាងក្រុង) មុខស្ថានីយ៍ប្រេងឥន្ធនៈ យីហោ ប៉ាប៉ា ស្ថិតនៅភូមិ ថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប មានករណីគ្រោះថ្នាក់ ចរាចរណ៍មួយកើតឡើងដោយម៉ូតូទៅបុករថយន្ត បណ្តាលឲ្យស្លាប់ម្នាក់ ។

តាមការបញ្ជាក់ពីសមត្ថកិច្ច បានឲ្យដឹងថាករណីគ្រោះថ្នាក់ចរាចរណ៍ រវាង ម៉ូតូម៉ាក Honda Dream ពណ៌ខ្មៅ ពាក់ស្លាកលេខ 1Q-6651 សៀមរាប បើកបរដោយ ឈ្មោះ ឃឹម គីរី ភេទប្រុស អាយុ៣៨ឆ្នាំ មុខងារ វរ:សេនីយ៍ទោ នាយរងការិយាល័យផ្សព្វផ្សាយនៃស្នងការដ្ឋាននគរបាលខេត្តសៀមរាប មានទីលំនៅ ភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប បានបើកបរម៉ូតូក្នុងទិសដៅពីកើតទៅលិច បានទៅបុករថយន្ត ម៉ាក Hyundai  បណ្តាលឲ្យស្លាប់ភ្លាមៗនៅហ្នឹងកន្លែង ។

ចំណែករថយន្ត Hyundai  ក្រោយត្រូវម៉ូតូជនរងគ្រោះ បុក ក៏បានបើករត់ទៅទិសខាងកើត ហើយ បានចុះរត់បាត់ស្រមោល បន្សល់ទុករថយន្តនៅនិងកន្លែង ។

ក្រោយកើតហេតុ កម្លាំងនគរបាលការិយាល័យជំនាញ បានចុះធ្វើការវាស់វែង និង យកវត្ថុតាងទៅរក្សាទុក នៅការិយាល័យនគរបាលចរាចរណ៍ផ្លូវគោក ។ ចំពោះមូលហេតុនៃគ្រោះថ្នាក់ចរាចរណ៍នេះ គឺអ្នកបើកបរម៉ូតូ បើកល្បឿនលឿន នៅកន្លែងផ្លូវកោងខ្វះការប្រុងប្រយ័ត្ន។ បច្ចុប្បន្ន សាកសពប្រគល់ឲ្យ សាច់ញាតិយកទៅធ្វើបុណ្យតាមប្រពៃណី  ៕