ភ្នំពេញ ៖ 

តូបលក់បាយនិងលក់កាហ្វេ សង់នៅចិញ្ចើមផ្លូវជាប់បង្គោលភ្លើងដ៏ធំមួយ ត្រូវបានអគ្គិភ័យឆាបឆេះស្ទើរទាំងស្រុង តែមិនបង្កគ្រោះថ្នាក់ដល់បងប្អូនប្រជាពលរដ្ឋនៅទីតាំងកន្លែងកើតហេតុនោះឡើយ ដោយរថយន្តពន្លត់អគ្គិភ័យមកជួយបាញ់ទាន់ពេលវេលា ។ ហេតុការណ៍នេះ បានបង្កការភ្ញាក់ផ្អើលកាលពីវេលាម៉ោង ១និង២០នាទី រំលងអធ្រាត្រឈានចូលថ្ងៃទី០៤ ខែវិច្ឆិកា ឆ្នាំ២០២៤ នៅជិតផ្សារ អង្គ ស្ថិតសង្កាត់ ចោមចៅ ទី៣ ខណ្ឌ ពោធិសែនជ័យ ។ 

តាមប្រភពព័ត៌មានពីបងប្អូនប្រជាពលរដ្ឋនៅកន្លែងកើតហេតុ បាននិយាយប្រាប់ថានៅមុនពេលកើតហេតុ ដោយមានទុស្សេចេញពីបង្គោលភ្លើងនៅចំណុចកើតហេតុ ហើយបន្ទាប់មក មានផ្កាភ្លើងធ្លាក់ឆេះតូបលក់បាយនិងលក់កាហ្វេបងប្អូនប្រជាពលរដ្ឋ ដែលសង់ខាងក្រោមបង្គោលភ្លើង បណ្តាលឲ្យឆាបឆេះយ៉ាងសន្ធោសន្ធៅ ។

ខណៈពេលនោះ បងប្អូនប្រជាពលរដ្ឋ បានទាក់ទងទៅរថយន្តពន្លត់អគ្គិភ័យ ដើម្បីជួយសង្គ្រោះបន្ទាន់ផងដែរ។ នៅក្នុងហេតុការណ៍នោះ មិនមានគ្រោះថ្នាក់ដល់បងប្អូនប្រជាពលរដ្ឋឡើយ។ ប្រជាពលរដ្ឋនៅកន្លែងកើតហេតុ បានរៀបរាប់ប្រាប់ថាទីតាំងខាងលើធ្លាប់មានឆ្លងចរន្តទុស្សេអគ្គិសនីជាច្រើនលើកមកហើយ ។

ក្រោយពេលកើតហេតុ បន្ទាប់ពីរថយន្តពន្លត់អគ្គិភ័យបាញ់ពន្លត់រួច មានរថយន្តខាងផ្នែកអគ្គិសនីបានចុះមកទីតាំងកន្លែងកើតហេតុភ្លាមៗ ដើម្បីរៀបចំខ្សែភ្លើងនិងបង្គោលភ្លើង ខាងលើជាបន្តបន្ទាប់ ៕