បើនិយាយពីអ្នកគ្រប់គ្រងការប្រកួតថ្នាក់ជាតិ ឬ National Director កញ្ញាឯកចក្កវាឡកម្ពុជា ឆ្នាំ២០២៤ ច្បាស់ណាស់ថាអ្នកគាំទ្រវិស័យមួយនេះប្រាកដជាស្គាល់លោក ឈួង យីវឆូយ ជាក់ជាពុំខាន។ យ៉ាងណាមិញបន្ទាប់ពីអ្នកគ្រប់គ្រងការប្រកួតថ្នាក់ជាតិរូបនេះ បានធ្វើដំណើរទៅកាន់ប្រទេសម៉ិកស៊ិកដើម្បីគាំទ្រ អ្នកនាង ប្រាសាទ ដាវីន ដែលបាននឹងកំពុងធ្វើការប្រកួតប្រជែងយ៉ាងស្វិតស្វាញជាមួយបេក្ខភាពចូលរួមជាង១៣០ប្រទេស ក្នុងវេទិកាប្រកួតសម្រស់ខាងលើ លោកបានពោលពាក្យទាំងនឹកស្មានមិនដល់នៅលើបណ្តាញសង្គមពេលទៅដល់ប្រទេសនេះថ្មីៗយ៉ាងដូច្នេះថា « សុំ drama បន្តិច ពេលឈានជើងមកដល់ទឹកដីមិចស៊ីកូ មន្ត្រីនៅព្រលានយន្តហោះសួរខ្ញុំថាមកពីណា? ខ្ញុំថា “I’m from Cambodia” គេថាគេអត់ស្គាល់ ទាល់តែខ្ញុំរៀបរាប់ឈ្មោះប្រទេសក្បែរខាង ទើបគេស្គាល់ ។ 

តែពេលមកដល់ទីតាំងប្រកួត ឬសូម្បីតែខាងក្រៅសណ្ឋាគារ ម្នាក់ៗស្រែកឈ្មោះ Cambodia ពេញៗមាត់»។ លោកបន្តទៀតថា «នេះក៏ព្រោះតែឥទ្ធិពលនៃអ្នកតំណាងដែលស្ពាយឈ្មោះ Cambodia ទៅឱ្យគេស្គាល់។ គេសរសើរពេញៗមាត់! We did it ប្រាសាទ ដាវីន អ្នកខ្លះអាចមើលរំលងពីគុណតម្លៃនៃវិស័យនេះ តែខ្ញុំមើលឃើញពីឥទ្ធិពល» ។

ដោយឡែកបើក្រឡេកទៅមើលការប្រកួតរបស់អ្នកនាង ប្រាសាទ ដាវីន វិញ គឺនៅសល់តែប៉ុន្មានថ្ងៃទៀតប៉ុណ្ណោះ នឹងឈានមកដល់វគ្គប្រកួតសំខាន់ៗហើយក្នុងនោះមានដូចជា វគ្គប្រកួតបឋមដែលក្នុងនោះមានការប្រកួតឈុតហែលទឹក ឈុតរាត្រីសមោសរ និងឈុតតំណាងជាតិ ដែលនឹងធ្វើឡើងនៅថ្ងៃទី១៤ ខែវិច្ឆិកា ឆ្នាំ២០២៤ និងវគ្គផ្តាច់ព្រ័ត្រធ្វើឡើងនៅថ្ងៃទី១៦ ខែវិច្ឆិកា ឆ្នាំ២០២៤ ម៉ោងនិងពេលវេលានៅក្នុងប្រទេសម៉ិកស៊ិក ៕