ជនជួញដូរគ្រឿងញៀនប្រដាប់ដោយអាវុធម្នាក់ ត្រូវនគរបាលឃាត់ខ្លួន

ខេត្តកណ្ដាល ៖ 

ជនជួញដូរគ្រឿងញៀនប្រដាប់ដោយអាវុធម្នាក់ ត្រូវនគរបាលឃាត់ខ្លួនកាលពីវេលាម៉ោង៣និង៣០នាទីរសៀលថ្ងៃទី១៩ ខែវិច្ឆិកា ឆ្នាំ២០២៤ នៅតាមផ្លូវបេតុង ភូមិត្រពាំងត្រាច ឃុំដំណាក់អំពិល ស្រុកអង្គស្នួល ខេត្តកណ្ដាល ។ បន្ទាប់មក បានបញ្ជូនទៅកាន់អធិការដ្ឋាននគរបាលស្រុកអង្គស្នួល ធ្វើការសួរនាំ និងកសាងសំណុំរឿងបញ្ជូនទៅសាលាដំបូងខេត្តកណ្ដាលចាត់ការតាមច្បាប់ ។ 

ជនសង្ស័យរូបនោះ ឈ្មោះ ឆាំ អុល ភេទប្រុស អាយុ៣១ឆ្នាំ ជនជាតិខ្មែរ មានទីលំនៅភូមិព្រៃសាលា  ឃុំរលាំងគ្រើល  ស្រុកសំរោងទង ខេត្តកំពង់ស្ពឺ មានសារធាតុញៀនក្នុងទឹកនោម(+)÷ ។ 

ក្រោយឃាត់ខ្លួន  នគរបាល បានដកហូតវត្ថុតាងមួយចំនួនពីជនសង្ស័យរួមមាន៖ 

-ម្សៅក្រាមសថ្លា សង្ស័យសារធាតុញៀន(ម៉ាទឹកកក)ចំនួន០៥កញ្ចប់ ក្នុងនោះកញ្ចប់ធំចំនួន០២កញ្ចប់ និងកញ្ចប់មធ្យមចំនួន០៣កញ្ចប់ ដែលមានទម្ងន់សរុប២២៣,៨ក្រាម , អាវុធខ្លី០១ដើមម៉ាកK54បង់០១ គ្រាប់០៦គ្រាប់។ រថយន្ត០១គ្រឿងម៉ាកToyota  Prius  ស៊េរីឆ្នាំ២០១២ ពណ៌ទឹកប្រាក់ ពាក់ស្លាកលេខភ្នំពេញ2BF.4636 (គ្មានឯកសារ),ជញ្ជីងថ្លឹងថ្នាំញៀន០១,ប្រាក់ចំនួន៤លានរៀល, ទូរស័ព្ទដៃ១គ្រឿងម៉ាក Oppo និងឧបករណ៍ប្រើប្រាស់ ព្រមទាំងវេចខ្ចប់ថ្នាំញៀនមួយចំនួនទៀត ។ 

ជនសង្ស័យ បានសារភាពថា ថ្នាំញៀនប្រភេទម៉ាទឹកកកទាំងអស់នោះ ខ្លួនទិញពីមុខសញ្ញាជួញដូរគ្រឿងញៀនម្នាក់ឈ្មោះ ធី ភេទប្រុស អាយុប្រហែល៣៧ឆ្នាំ ជនជាតិខ្មែរ រស់នៅក្នុងខេត្តកំពង់ស្ពឺ ក្នុងតម្លៃ២លានរៀល ៕