រថយន្តដឹកទំនិញបុករថយន្តធុនធំពីក្រោយ បណ្តាលឲ្យស្លាប់ម្នាក់និងរបួសធ្ងន់ម្នាក់

ខេត្តបាត់ដំបង ៖

រថយន្តដឹកទំនិញធុនធ្ងន់បើកបុករថយន្តធុនធំពីក្រោយពេញទំហឹងបណ្តាលឲ្យព្រូម្នាក់ស្លាប់ និងអ្នកបើកបរ រងរបួសធ្ងន់ បង្កការភ្ញាក់ផ្អើលនៅវេលាម៉ោង ០៤និង៣០នាទី ថ្ងៃទី២២ ខែវិច្ឆិកា ឆ្នាំ ២០២៤ នៅតាមបណ្តោយផ្លូវហាយវេ ស្ថិតក្នុងភូមិស្វាយធំ ឃុំអូរដំបង២ ស្រុកសង្កែ ខេត្តបាត់ដំបង ។

  ប្រភពនៅកន្លែងកើតហេតុ បានប្រាប់ថា នៅមុនពេលកើតហេតុ គេឃើញរថយន្តធុនធំ ពណ៌ខៀវ មួយគ្រឿង ពាក់ផ្លាកលេខខាងមុខ ចង្កូតស្តាំ.KCH.0211 និងផ្លាកលេខខាងក្រោយ ភ្នំពេញ.4A.1517 បើកបរដោយបុរសម្នាក់ទិសដៅពីកើតទៅលិច លុះមកដល់ចំណុចកើតហេតុក៏ស្រាប់តែមានរថយន្តដឹកទំនិញធុនធ្ងន់ពណ៌ស មួយគ្រឿង ពាក់ផ្លាកលេខភ្នំពេញ 3F.8601បើកបរដោយបុរសម្នាក់និងព្រូម្នាក់ក្នុងល្បឿនយ៉ាងលឿន ទំនងឡើងវ៉ាជែងមិនផុត ក៏ជ្រុលមកបុកពីក្រោយពេញទំហឹង បណ្តាលអោយព្រូស្លាប់ភ្លាមៗ និងអ្នកបើកបររងរបួសធ្ងន់តែម្តង ។

ក្រោយពេលកើតហេតុសមត្ថកិច្ចជំនាញបានចុះទៅ ដឹកជនរងគ្រោះទៅសង្រ្គោះនៅមន្ទីរពេទ្យ ចំណែកសាកសពដឹកយកទៅរក្សាទុកនៅវត្តបច្ឆារងចាំសាច់ញាតិមកទទួលយកទៅធ្វើបុណ្យ ដោយឡែកមធ្យោបាយទាំងពីរគ្រឿងត្រូវបានសមត្ថកិច្ចវាស់វែងធ្វើកំណត់ហេតុយកទៅរក្សាទុកនៅការិយាល័យចរាចរណ៍ផ្លូវគោកដើម្បីរងចាំដោះស្រាយតាមផ្លូវច្បាប់ ៕