រាជធានីភ្នំពេញ ៖ 

យ៉ាងហោចណាស់ក៏មានមនុស្សចំនួន៣នាក់ដែរ បានរងរបួសធ្ងន់ធ្ងរ ខណៈពួកគាត់ជិះម៉ូតូម៉ាកហុងដាឌ្រីមចំនួន២គ្រឿង ក្នុងទិសដៅបញ្រ្ចាសទិសគ្នា ហើយបានជ្រុលទៅបុកគ្នាពេញទំហឹង ។

ហេតុការណ៍ខាងលើ បានកើតឡើងនៅវេលាម៉ោង៧និង៣០នាទីព្រឹកថ្ងៃទី០៤ ខែវិច្ឆិកា ឆ្នាំ២០២៤ នៅតាមផ្លូវបេតុងអមផ្លូវរថភ្លើង ត្រង់ចំណុចមុខរោងចក្រទឹកកក ភូមិស្រែក្នុង សង្កាត់កន្ទោក ខណ្ឌកំបូល រាជធានីភ្នំពេញ ។

ស្រ្តីម្នាក់ដែលបានឃើញហេតុការណ៍ បាននិយាយថា នៅមុនពេលកើតហេតុ គាត់បានឃើញម៉ូតូម៉ាកហុងដាឌ្រីមសេ១២៥  ពណ៌ខ្មៅ ពាក់ស្លាកលេខភ្នំពេញ1JI-3990 ជិះដោយស្រ្តី២នាក់ចេញពីក្នុងរោងចក្រទឹកកក ក្នុងទិសដៅពីលិចទៅកើត ឡើងផ្លូវបេតុងខាងលើ ។ លុះពេលទៅដល់ត្រង់ចំណុចកើតហេតុ ស្រាប់តែមានម៉ូតូម៉ាកហុងដាឌ្រីមសេ១២៥ពណ៍ខ្មៅមួយគ្រឿងទៀត ពាក់ស្លាកលេខភ្នំពេញ1AL-3143 ជិះដោយយុវជនម្នាក់តាមផ្លូវបេតុងខាងលើ ក្នុងទិសដៅពីជើងទៅត្បូងទៅដល់បុកចំទទឹងម៉ូតូស្រ្តី២នាក់នោះពេញទំហឹង បណ្ដាលឲ្យរងរបួសធ្ងន់ទាំងសងខាងចំនួន៣នាក់តែម្ដង ។

ក្រោយពេលកើតហេតុ ជនរងគ្រោះទាំងអស់ ត្រូវបានក្រុមគ្រួសារបញ្ជូនទៅសង្រ្គោះនៅមន្ទីរពេទ្យជាតិតេជោសន្តិភាពរៀងខ្លួន បន្ទាប់មក នគរបាលខណ្ឌកំបូលបានចុះទៅធ្វើការវាស់វែង ហើយនាំយកម៉ូតូទាំង២គ្រឿង ទៅរក្សាទុកនៅអធិការដ្ឋាននគរបាលខណ្ឌ រង់ចាំការដោះស្រាយនៅពេលក្រោយ ៕