កាលពីពេលថ្មីៗនេះ នាដការូបស្រស់ សុគា គីមលាង ឬ មហាជនស្គាល់ថា កូនអាន (Kon Ant) បានបង្ហើបឱ្យដឹងពីដំរួយដ៏គួរឱ្យភ្ញាក់ផ្អើលមួយនៅលើបណ្តាញសង្គមហ្វេសប៊ុកថា នាងនឹងត្រៀមខ្លួនចូលរួមប្រកួតប្រជែងនៅក្នុងវេទិកាសម្រស់ កញ្ញាឯកចក្កវាឡកម្ពុជា ឆ្នាំ ២០២៥។ ទន្ទឹមនឹងការបង្ហោះសារដ៏គួរឱ្យភ្ញាក់ផ្អើលនេះ មានមហាជនជាច្រើន បានសាទរនូវការសម្រេចចិត្តមួយនេះ ព្រោះវាក៏ជាក្តីស្រមៃរបស់អ្នកគាំទ្រដូចគ្នាដែរ ដែលចង់ឃើញកូនអានចូលប្រលូកក្នុងវិស័យបវរកញ្ញាជាយូរមកហើយ ជាមួយគ្នានេះក៏មានមហាជនមួយចំនួនទៀតផងដែរ បានចោទជាសំណួរផ្សេងៗដោយចង់ដឹងពីជីវប្រវត្តិបន្ថែមក្រៅពីអាជីពជានាដការបស់នាង ក៏ដូចជាបទពិសោធន៍ការងារសង្គមជាដើម ។

តបទៅកាន់អ្នកគាំទ្រ កូនអាន (Kon Ant) បានឆ្លើយយ៉ាងដូច្នេះថា “នាងបានបញ្ចប់ការសិក្សាពីសាលមធ្យមវិចិត្រសិល្បៈនៅអំឡុងឆ្នាំ ២០១៦ ពោលគឺក្រោយពេលចប់ការសិក្សា នឹងទទួលបានសញ្ញាបត្រចំនួនពីរ ក្នុងនោះមានដូចជាសញ្ញាបត្រចំណេះដឹងទូទៅខ្មែរ និងសញ្ញាបត្រទាក់ទងនឹងជំនាញខាងផ្នែកសិល្បៈ”។ កូនអាន ក៏បានបន្តទៀតថា “ពាក់ព័ន្ធនឹងផ្នែកភាសាអង់គ្លេស គឺអាចប្រាស្រ័យទាក់ទងគ្នាបានគួរសម ចំណែកឯពាក់ព័ន្ធនឹងការងារសង្គម គឺជានិច្ចជាកាលតែងតែធ្វើជានិច្ច គ្រាន់តែពេលខ្លះមិនសូវបានបង្ហាញនៅតាមបណ្តាញសង្គមប៉ុណ្ណោះ” ។

យ៉ាងណាមិញ នាដការូបស្រស់ កូនអាន បានបញ្ជាក់ច្បាស់ៗដែរថា មុននឹងសម្រេចិត្តដើរលើវិស័យបវរកញ្ញានេះ នាងបានត្រៀមខ្លួនរាល់ហើយ ទាំងការដើរ សំណួរចម្លើយ និងភាពជា Beauty Queen ជាដើម។ កូនអាន ក៏នឹងទទួលយកការរិះគន់ទាំងអស់ក្នុងន័យស្ថាបនា ប្រសិនបើនាងមានចំណុចខ្វះខាតត្រង់ប្រការណាមួយ ព្រោះវិស័យមួយនេះគឺជាចំនុចចាប់ផ្តើម ក៏ដូចជាជំហានដំបូងរបស់នាងផងដែរ ៕