កីឡាករ កីឡាការិនីមកពីសហព័ន្ធកីឡាជាតិកម្ពុជាជាច្រើនប្រភេទកីឡា ដូចជាតេក្វាន់ដូ WT វូស៊ូ គុនល្បុក្កតោ ប្រដាល់គុនខ្មែរជាដើម បានបង្ហាញក្តីរីករាយជាខ្លាំង ក្នុងការចូលរួមបង្ហាញក្បាច់សម្តែងពិសេសៗ យ៉ាងជក់ចិត្តជាច្រើនឈុត ជូនដល់ប្រិយមិត្តទស្សនិកជនជាតិ និងអន្តរជាតិ ក្នុងកម្មវិធី The Peak Prelude នៅផ្សារទំនើប ដឺភីក កាលពីរាត្រីថ្ងៃទី០៩ ខែវិច្ឆិកា ឆ្នាំ២០២៤ ។

ក្រុមជម្រើសជាតិកីឡាវូស៊ូកម្ពុជា ដែលបានដឹកនាំដោយលោក ម៉ៅ ចន្ថាវុធ អគ្គលេខាធិការ សហព័ន្ធកីឡាវូស៊ូកម្ពុជា និងអ្នកគ្រូជំនាញរបស់សហព័ន្ធបានឱ្យដឹងថា ក្នុងកម្មវិធីនេះ លោកគ្រូបានដឹកនាំកីឡាករ កីឡាការិនីជម្រើសជាតិចំនួន៨នាក់ មកចូលរួមសម្តែងក្បាច់គុនពិសេសៗ បង្ហាញជូនមហាជន ភ្ញៀវជាតិ និងអន្តរជាតិ ក្នុងកម្មវិធីនេះ ក្រោមការរៀបចំ និងគាំទ្រយ៉ាងពេញទំហឹងពីកម្មវិធី The Peak Prelude។ គ្រូជំនាញសហព័ន្ធបានបង្ហាញក្តីរីករាយ ដែលផ្សារទំនើប ដឺភីក បានគាំទ្រនិងបានអញ្ជើញកីឡាករ កីឡាការិនីចូលរួមបង្ហាញក្នុងកម្មវិធីនេះ ដើម្បីបំផុសស្មារតីឱ្យមហាជនកាន់តែស្គាល់ និងស្រឡាញ់កីឡាវូស៊ូកម្ពុជា ។

សម្រាប់ការសាកល្បងរួមចំណែកដល់សិល្បៈក្បាច់គុណខ្មែរ និងការដើរម៉ូតសំលៀកបំពាក់កែច្នៃឡើងវិញ បាននាំមកនូវភាពរស់រវើក និងភាពរំភើបរីករាយ ដែលជាស៊េរីព្រឹត្តិការណ៍ក្នុងដំណាក់កាលការបើកដំណើរការសាកល្បង ដែលរួមបញ្ចូលគ្នានូវសិល្បៈ កីឡា អាហារ និងការតាំងពិពណ៌ជាច្រើន ។