រាជធានីភ្នំពេញ ៖ 

បុរសជនជាតិចិនម្នាក់ បានបើករថយន្តម៉ាកឡិចស៊ិសRX-300 ១គ្រឿង ជ្រុលទៅបុកម៉ូតូម៉ាកហុងដាឌ្រីមសេ១២៥មួយគ្រឿងជិះ២នាក់ប្តីប្រពន្ធ កំពុងបត់ឆ្វេងឆ្លងផ្លូវ បណ្តាលឲ្យជនរងគ្រោះជាប្រពន្ធ រងរបួសធ្ងន់ ចំណែកប្ដី រងរបួសស្រាល ។

ហេតុការណ៍នោះ បានកើតឡើងកាលពីវេលាម៉ោង៦ និង២៥នាទីព្រឹកថ្ងៃទី០៤ ខែវិចិ្ឆកា ឆ្នាំ២០២៤ ស្ថិតនៅតាមផ្លូវជាតិលេខ៤ កែងផ្លូវបេតុងត្រង់ចំណុចមុខវត្តកំបូល ក្នុងភូមិព្រៃបឹង សង្កាត់កន្ទក ខណ្ឌកំបូល រាជធានីភ្នំពេញ ។

ប្រភពអ្នកនៅកន្លែងកើតហេតុ បានប្រាប់ថានៅមុនពេលកើតហេតុ គេឃើញមានរថយន្ត១គ្រឿងម៉ាកឡិចស៊ីស RX300 ពណ៌ស្ករ ពាក់ស្លាកលេខ ព្រះសីហនុ2A-2944 បើកបរដោយបុរសជនជាតិចិនម្នាក់តាមផ្លូវជាតិលេខ៤ ក្នុងទិសដៅពីលិចទៅកើត។ ចំណែកជនរងគ្រោះ២នាក់ប្តីប្រពន្ធ ជិះម៉ូតូ១គ្រឿង ម៉ាកហុងដាឌ្រីមសេ១២៥ ស៊េរី ឆ្នាំ ២០១៧ ពណ៌ខ្មៅ ពាក់ស្លាកលេខកណ្តាល1R-3146 ធ្វើដំណើរតាមផ្លូវជាតិលេខ៤ដូចគ្នា ក្នុងទិសដៅពីកើតទៅលិច ។

ប្រភពដដែល បានប្រាប់ទៀតថាលុះពេលទៅដល់ត្រង់ចំណុចកើតហេតុ ជនរងគ្រោះបានបត់ឆ្វេងឆ្លងផ្លូវចូលទៅតាមផ្លូវបេតុង ក៏ត្រូវរថយន្តបុកពេញទំហឹង បណ្តាលឲ្យប្រពន្ធរបួសធ្ងន់ ហើយ ប្ដីរបួសស្រាល ។ ក្រោយពេលកើតហេតុ រថយន្ត ក៏ឈប់នៅទីនោះដែរ បន្ទាប់មក ស្ត្រីដែលរងរបួសធ្ងន់ ត្រូវបញ្ជូនទៅសង្រ្គោះនៅមន្ទីពេទ្យ ។ 

ដោយឡែក នគរបាលប៉ុស្តិ៍កន្ទោក និងនគរបាលខណ្ឌកំបូល ក៏បានចុះទៅធ្វើការវាស់វែង រួចនាំយកម៉ូតូនិងរថយន្តទៅរក្សាទុករង់ចាំធ្វើការដោះស្រាយនៅពេលក្រោយ ៕