នាថ្ងៃទី១២ ខែកុម្ភៈ ឆ្នាំ២០២៥ លោក គុជ ឆៃយ៉ា ប្រធានចាត់ការទូទៅ ក្រុមបាល់ទាត់ពិធីករកីឡាកម្ពុជា លោករឿង សោភ័ណ្ឌ តំណាងឯកឧត្តម ខូវ ឆាយ ប្រធានសព័ន្ធកីឡាប្រដាល់គុនខ្មែរ និងជាប្រធានក្រុមបាល់ទាត់ គុនខ្មែរ និង និងលោកវេជ្ជបណ្ឌិត សុខ ប៉ូ នាយកមជ្ឈមណ្ឌលជាតិផ្តល់ឈាមបានចូលរួមពិធីសន្និសីទសារព័ត៌មានស្តីពីព្រឹត្តិការណ៍ការប្រកួតបាល់ទាត់មនុស្សធម៌ ក្រោមប្រធានបទ “យើងរួមគ្នាបរិច្ចាគឈាម ១០០០សាក់ ដើម្បីជួយសង្គ្រោះជីវិត» នៅភោជនីយដ្ឋានទន្លេសាបាក់។
លោក គុជ ឆៃយ៉ា ប្រធានចាត់ការទូទៅ ក្រុមបាល់ទាត់ពិធីករកីឡាកម្ពុជា បានលើកឡើងថា មុនការប្រកួតចាប់ផ្តើមជាផ្លូវការនាព្រឹកថ្ងៃទី ១៨ ខែកុម្ភៈ ឆ្នាំ២០២៥ ក្រុមកីឡាករទំាង២ក្រុមនឹងនាំគ្នាធ្វើការ បរិច្ចាគឈាមនឹងចាប់ផ្តើមនៅវេលាម៉ោង ៧:៣០ នាទីព្រឹករហូតដល់ម៉ោង ៥:០០ នាទីល្ងាច ក្រៅពីកម្មវិធីបរិច្ចាគឈាមក៏មានការប្រកួតបាល់ទាត់មិត្តភាពរវាងក្រុមបាល់ទាត់ពិធីករកីឡាកម្ពុជា ជាមួយ ក្រុមបាល់ទាត់គុនខ្មែរ ចាប់ពីម៉ោង ៦:០០ ល្ងាចតទៅ នៅមជ្ឈមណ្ឌលកីឡាកងយោធពលខេមរភូមិន្ទ (ស្តាតចាស់) នាថ្ងៃទី១៨ ខែកុម្ភៈ ឆ្នាំ២០២៥ ដូចគ្នាផងដែរ។
លោកប្រធានចាត់ការទូទៅ ក្រុមបាល់ទាត់ពិធីករកីឡាកម្ពុជាបានបន្តថា ព្រឹត្តិការណ៍ប្រកួតបាល់ទាត់មនុស្សធម៌ រវាងក្រុមពិធីករកីឡាកម្ពុជា និងបាល់ទាត់គុនខ្មែរ ក្រោមប្រធានបទ “យើងរួមគ្នាបរិច្ចាគឈាម ១០០០សាក់ ដើម្បីជួយសង្គ្រោះជីវិត” រវាងក្រុមបាល់ទាត់ពិធីករកីឡាកម្ពុជា និងក្រុមបាល់ទាត់គុនខ្មែរធ្វើឡើង ដោយមានការចង្អុលបង្ហាញណែនាំ និងគាំទ្រដ៏ខ្ពស់ខ្ពស់ពីសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា៕
