ភ្នំពេញ៖ សហព័ន្ធប្រដាល់គុនខ្មែរ នឹងរៀបចំព្រឹត្តិការណ៍កីឡាបាល់ទាត់មិត្តភាពកម្ពុជា-ថៃ នៅថ្ងៃទី៨ ខែមីនា ឆ្នាំ២០២៥ ដើម្បីអបអរសាទរខួបអនុស្សាវរីយ៍លើក៧៥ឆ្នាំ នៃការបង្កើតទំនាកទំនងការទូតកម្ពុជា-ថៃ។ ព្រឹត្តិការណ៍កីឡាបាល់ទាត់នេះ នឹងប្រារព្ធឡើងនៅពហុកីឡដ្ឋានជាតិអូឡាំពិក រាជធានីភ្នំពេញ។
ជាមួយគ្នានេះ នៅក្នុងព្រឹត្តិការណ៍នេះ អាជ្ញាធរ នឹងរៀបចំពង្រឹងសណ្តាប់ធ្នាប់សាធារណៈ និងសន្តិសុខសុវត្ថិភាព ជាពិសេសសម្រួលចរាចរណ៍ជាបណ្ដោះអាស្នននៅជុំវិញតំបន់ពហុកីឡដ្ឋានជាតិអូឡាំពិក ចាប់ពីម៉ោង១ថ្ងៃត្រង់ រហូតដល់ចប់កម្មវិធី ដើម្បីធានាឱ្យកម្មវិធីប្រព្រឹត្តទៅយ៉ាងរលូន។ រដ្ឋបាលរាជធានីភ្នំពេញ អំពាវនាវឱ្យអាជ្ញាធរពាក់ព័ន្ធផ្សព្វផ្សាយដល់សាធារណជនឱ្យកាន់តែទូលំទូលាយ និងអនុវត្តប្រកបដោយប្រសិទ្ធិភាព៕
យ៉ាងណាមិញ សម្រាប់លោកបណ្ឌិត ស៊ីផាឆៃ វីរៈភូជុង នាយកប្រតិបត្តិនៃទូរទស្សន៍ប៉ុស្តិ៍លេខ៥ និងជាអ្នកជួយសម្របសម្រួលការងារជាមួយភាគីថៃក៏បានបញ្ជាក់ថា ការរៀបចំការប្រកួតកីឡាបាល់ទាត់កម្ពុជា-ថៃនេះ ជាការប្រកួតមិត្តភាព ដែលមានកីឡាករ និងតារាល្បីៗរបស់ថៃ និងកីឡាករនិងតារាល្បីៗរបស់កម្ពុជាចូលរួមជាកីឡាករក្នុងការប្រកួតនេះ ក្នុងនោះសម្រាប់កីឡាករ និងតារាល្បីៗ និងកីឡាករល្បីៗរបស់ថៃមានចំនួន៥០នាក់។
លោកបណ្ឌិត ស៊ីផាឆៃ វីរៈភូជុង បានបន្តថា គោលបំណងរបស់យើងគឺចង់ឱ្យប្រទេសយើងទាំងពីរ មានសន្តិភាពជាមួយគ្នារហូតតទៅ។ មុនការចូលរួមការប្រកួតនេះ លោកនឹងកោះប្រជុំជាមួយក្រុមកីឡាករ និងអ្នកពាក់ព័ន្ធទាំងអស់អំពីបំណងនៃការបង្កើតឱ្យមានព្រឹត្តិការណ៍នេះ ដើម្បីឱ្យពួកគាត់បានយល់ជ្រួតជ្រាបនោះគឺជាការប្រកួតមិត្តភាព រិតចំណងមិត្តភាពនៃប្រទេសទាំង២។
