ភ្នំពេញ ៖ ប្រធានសហព័ន្ធកីឡាប្រដាល់គុនខ្មែរ ឯកឧត្តម ខូវ ឆាយ បានស្នើឱ្យម្ចាស់កម្មវិធី ឬម្ចាស់សង្វៀនរៀបចំការប្រកួតកម្រិតថ្នាល គួរណាស់ផ្តល់តម្លៃខ្លួនដល់កីឡាករថ្នាល ចាប់ពី២០ម៉ឺនរៀលឡើងទៅ ដើម្បីរួមចំណែកលើកទឹកចិត្តដល់យុវជនឱ្យចូលរួមហ្វឹកហាត់ប្រដាល់គុនខ្មែរបានកាន់តែច្រើន ក៏ដូចជាលើកកម្ពស់ជីវភាពដល់កីឡាករថ្នាល ជាពិសេសអ្នកធ្វើដំណើរមកពីខេត្តឆ្ងាយៗ។
ការលើកឡើងបែបនេះបែបនេះ ដោយសារឯកឧត្តម ខូវ ឆាយ បានទទួលដំណឹងមកថា មានម្ចាស់កម្មវិធីថ្នាលមួយចំនួន បានផ្តល់តម្លៃខ្លួនដល់កីឡាករថ្នាលក្នុងកម្រិតក្រោម១០ម៉ឺនរៀល ក្នុងមួយប្រកួត ដែលមិនអាចឱ្យពួកគេសល់ថវិកា សម្រាប់យកទៅជួយដល់គ្រួសារនោះទេ ព្រោះការធ្វើដំណើរមកប្រកួតត្រូវចំណាយច្រើន។
ឯកឧត្តម ខូវ ឆាយ បានបង្ហោះសារបែបនេះថា៖ «សហព័ន្ធកីឡាប្រដាល់គុនខ្មែរ បាននឹងកំពុងរៀបចំការប្រកួតថ្នាលគុនខ្មែរ ប្រចាំសប្តាហ៍ នៅសង្វៀនឯកភ្នំ ខេត្តបាត់ដំបង និងសង្វៀនផ្សាររាត្រី៦០ម៉ែត្រ ខេត្តសៀមរាប ព្រមទាំងសង្វៀនថ្នាលចល័ត តាមបណ្តាខេត្ត ក្រុង ស្រុកនានាទូទាំងប្រទេស សឹងតែរៀងរាល់សប្តាហ៍ ដោយបានឧបត្ថម្ភតម្លៃខ្លួនកីឡាករ កីឡាការិនី ថ្នាលចាប់២០ម៉ឺនរៀលឡើង រហូតដល់៤០ម៉ឺនរៀល ទៅតាមកម្រិតអាយុ»។
បន្ថែមលើនេះ សហព័ន្ធកីឡាប្រដាល់គុនខ្មែរ ក៏មានការឧបត្ថម្ភថ្លៃធ្វើដំណើរ និងថ្លៃទ្រទ្រង់ក្លឹបគ្រប់ៗគ្នា ដើម្បីជួយលើកស្ទួយជីវភាព និងលើកទឹកចិត្តដល់កីឡាករ កីឡាការិនីថ្នាលយើង ឱ្យងាកមកចូលរួមហ្វឹកហាត់កីឡាប្រដាល់គុនខ្មែរកាន់តែច្រើន។
ជាមួយគ្នានេះ ឯកឧត្តម បានបញ្ជាក់ថា៖ «ក្នុងឱកាសនេះដែរ ខ្ញុំបាទក៏សូមសំណូមពរដល់ម្ចាស់កម្មវិធីថ្នាលដ៏ទៃទៀត សូមផ្តល់តំលៃខ្លួនកីឡាករ កីឡាការិនីថ្នាលឱ្យបានសមរម្យ ទៅតាមកម្រិតនីមួយៗ គួរតែយ៉ាងតិចចាប់ពី២០ម៉ឺនរៀលឡើង ដើម្បីជួយទ្រទ្រង់ជីវភាពថ្នាលយើងផង។ កូនគេកូនយើង គួរឱ្យអាណិតណាស់»៕
