ភ្នំពេញ៖ គ្រូបង្វឹកក្រុមបាល់ទាត់ជម្រើសជាតិកម្ពុជា Koji Gyotoku បានដាក់គោលដៅដឹកនាំក្រុមបង្ហាញការលេងមួយដ៏ល្អ សម្រាប់អ្នកគាំទ្រក្រុមគោព្រៃ ក្នុងជំនួបមិត្តភាពអន្ដរជាតិ ជាមួយក្រុមក្រុមជម្រើសជាតិអារូបា នារាត្រីថ្ងៃទី២៥ ខែមីនា ឆ្នាំ២០២៥ ស្អែកនេះ នៅពហុកីឡដ្ឋានជាតិ(អូឡាំពិក) រាជធានីភ្នំពេញ។
លោក Koji បានសង្កត់ធ្ងន់ថា «អ្វីដែលសំខាន់ គឺពួកយើងត្រូវការជ័យជម្នះ ។ សម្រាប់ខ្ញុំ ខ្ញុំក៏ចង់បង្ហាញការលេងមួយឲ្យល្អ សម្រាប់អ្នកគាំទ្រផងដែរ ។ មួយវិញទៀត ពីមុនមក យើងធ្លាប់តែលេងជាមួយក្រុមក្នុងតំបន់ តែលើកនេះ យើងបានលេងជាមួយក្រុមមកពីតំបន់ផ្សេង ។ អ៊ីចឹងទម្រង់លេងរបស់គេ អាចនឹងមានការប្លែក។ នេះជាបទពិសោធន៍មួយថ្មីសម្រាប់យើង ហើយក៏វាជាផលល្អមួយសម្រាប់ក្រុមជម្រើសជាតិផងដែរ» ។
គួរដឹងថា នេះគឺជាការប្រកួតមិត្តភាពអន្ដរជាតិលើកទី២ កំឡុងថ្ងៃ FIFA Day របស់ក្រុមគោព្រៃកម្ពុជា បន្ទាប់ពីប្រកួតដំបូង កាលពីថ្ងៃទី១៩ ខែមីនាកន្លងទៅ ក្រុមជម្រើសជាតិកម្ពុជា បានចាញ់ក្រុមម្ចាស់ផ្ទះវៀតណាម ២-១ ។ រីឯក្រុមជម្រើសជាតិអារូបា មុនជួបម្ចាស់ផ្ទះកម្ពុជា ក៏ទើបរងបរាជ័យក្រោមថ្វីជើងក្រុមសមាជិកលីគកំពូលកម្ពុជា វិសាខា ក្នុងលទ្ធផល ៣-១ ផងដែរ ៕
