លោកប្រធានាធិបតីសហរដ្ឋអាមេរិក ដូណាល់ ត្រាំ បាននិយាយកាលពីថ្ងៃអង្គារ ទី22 ខែមេសាថា លោកនឹងមិនលេងធម៌ក្តៅលើពាណិជ្ជកម្មជាមួយប្រទេសចិនទេ ហើយពន្ធគយរបស់អាមេរិកលើប្រទេសចិន ក៏ “មិនអាចដល់” 145% ដូចដែលរដ្ឋបាលរបស់លោកបានពិភាក្សាកាលពីពេលមុនដែរ។ លោក ត្រាំ បានបង្ហាញសុទិដ្ឋិនិយមថា លោកនឹងធ្វើឲ្យមានវឌ្ឍនភាពជាមួយប្រទេសចិន ហើយក៏នឹងកាត់បន្ថយពន្ធយ៉ាងច្រើនលើការនាំចូលរបស់ប្រទេសចិន ប៉ុន្តែក៏បានព្រមានថា "ប្រសិនបើប្រទេសចិនមិនព្រមធ្វើកិច្ចព្រមព្រៀងនោះទេ យើងនឹងជាអ្នកកំណត់កិច្ចព្រមព្រៀង"។
