លោកប្រធានាធិបតីសហរដ្ឋអាមេរិក ដូណាល់ ត្រាំ បានប្រកាសថា សហរដ្ឋអាមេរិក នឹងចាប់ផ្តើមដាក់ពន្ធ និងវិធានការផ្សេងទៀតលើប្រទេសរុស្ស៊ី ក្នុងរយៈពេល "10 ថ្ងៃ ចាប់ពីថ្ងៃអង្គារ ទី29 ខែកក្កដា" ប្រសិនបើទីក្រុងមូស្គូ មិនបង្ហាញវឌ្ឍនភាពឆ្ពោះទៅរកការបញ្ចប់សង្គ្រាមដែលអូសបន្លាយអស់មកជាងបីឆ្នាំរបស់ខ្លួននៅក្នុងប្រទេសអ៊ុយក្រែនទេនោះ។ លោកប្រធានាធិបតី Trump បានប្រកាសជាលើកដំបូងកាលពីដើមសប្តាហ៍នេះថា លោកនឹងកាត់បន្ថយរយៈពេល 50 ថ្ងៃនៃឪសានុវាទពន្ធដែលលោកបានកំណត់កាលពីមួយខែមុន លើទីក្រុងមូស្គូ ដោយប្តូរមកត្រឹមរយៈពេល 10 ទៅ 12 ថ្ងៃវិញ។ ទន្ទឹមនឹងនេះ លោកប្រធានាធិបតី ត្រាំ ក៏បានព្រមានប្រទេសចិនថា ទីក្រុងប៉េកាំង ក៏អាចប្រឈមមុខនឹងពន្ធក្នុងអត្រាមួយដ៏ខ្ពស់ ប្រសិនបើបន្តការទិញប្រេងពីរុស្ស៊ី។
