គណៈកម្មាធិការស្វែងរកការពិតរបស់ប្រទេសស៊ីរីបានចេញរបាយការណ៍កាលពីថ្ងៃអង្គារទី 22 ខែកក្កដាថា មនុស្សចំនួន 1426 នាក់ក្នុងនោះមានស្ត្រី 90 នាក់ត្រូវបានសម្លាប់ អំឡុងពេលនៃការប្រយុទ្ធគ្នាកាលពីខែមីនា រវាងកងកម្លាំងសន្តិសុខស៊ីរី និងជនជាតិភាគតិស៊ីរី អាឡាវិដ (Alawite)។ ការប៉ះទង្គិចនេះ គឺជាអំពើហឹង្សាដ៏អាក្រក់បំផុតដែលកើតមានលើប្រទេសស៊ីរី ចាប់តាំងពីការដួលរលំរបស់របបលោកប្រធានាធិបតី បាសា អាល់ អាសាដ កាលពីឆ្នាំមុន។ អំពើហឹង្សាបានផ្ទុះឡើងកាលពីថ្ងៃទី 6 ខែមីនា ជាមួយនឹងការវាយប្រហារលើកងកម្លាំងសន្តិសុខស៊ីរី ដែលឈរជើងក្នុងតំបន់ ដោយកងកម្លាំងសន្តិសុខស៊ីរីចំនួន 238 នាក់ត្រូវបាសម្លាប់ ហើយជាការឆ្លើយតប ក្រុមប្រដាប់អាវុធប្រមាណ 20 ម៉ឺននាក់ ដែលមកពីទូទាំងប្រទេសស៊ីរី បានធ្វើដំណើរទៅកាន់តំបន់ជម្លោះនេះ ដែលជំរុញឲ្យមានករណីរំលោភសម្លាប់ ការលួចប្លន់ រីករាលដាលពាសពេញតំបន់។
