លោកប្រធានាធិបតីសហរដ្ឋអាមេរិក ដូណាល់ ត្រាំ បានចុះហត្ថលេខាលើបទបញ្ជាប្រតិបត្តិ ដើម្បីបន្តការពន្យាពេលយក "ពន្ធបដិការ" ដែលត្រូវផុតកំណត់កាលពីថ្ងៃទី 9 ខែកក្កដាសប្តាហ៍នេះ រហូតដល់ថ្ងៃទី 1 ខែសីហាខាងមុខ។ បន្ថែមពីលើការពន្យារពេលនេះ រដ្ឋមន្ត្រីក្រសួងរតនាគារសហរដ្ឋអាមេរិក លោក ស្កត ប៊េសេន (Scott Bessent) បានបញ្ជាក់ថា លោកប្រធានាធិបតី ត្រាំ នឹងផ្ញើលិខិតទៅកាន់ប្រទេសដៃគូពាណិជ្ជកម្មក្នុងសប្តាហ៍នេះ ដើម្បីជូនដំណឹងដល់ពួកគេ អំពីអត្រាពន្ធដែលសហរដ្ឋអាមេរិកគ្រោងនឹងដាក់ ខណៈដែលសម្រាប់ប្រទេស ដែលបរាជ័យក្នុងការឈានដល់កិច្ចព្រមព្រៀងពាណិជ្ជកម្មណាមួយ ជាមួយសហរដ្ឋអាមេរិកត្រឹមថ្ងៃទី 1 ខែសីហាខាងមុខនេះ អត្រាពន្ធបដិការនឹងត្រលប់ទៅកាន់អត្រា ដែលបានកំណត់ប្រកាសកាលពីខែមេសា។ គួរបញ្ជាក់ផងដែរថា លោកប្រធានាធិបតី ដូណាល់ ត្រាំ បានប្រកាសសម្រេចយកពន្ធបដិការពីចន្លោះ 25 ទៅ 40% លើប្រទេសដៃគូពាណិជ្ជកម្មចំនួន 14 ដែលក្នុងនោះ រួមមាន ប្រទេសមីយ៉ាន់ម៉ា ឡាវ កម្ពុជា ថៃ ស៊ែប៊ី បង់ក្លាដែស ឥណ្ឌូនេស៊ី អាហ្រ្វិកខាងត្បូង បូស្នៀ ទុយនេស៊ី កាហ្សាស្ថាន ម៉ាឡេស៊ី កូរ៉េខាងត្បូង និងជប៉ុន។
