ក្រសួងមហាផ្ទៃរបស់ប្រទេសប៊ុលហ្គារីបានបញ្ជាក់ថា អាជ្ញាធររបស់ខ្លួន បានរឹបអូសថ្នាំញៀនកូកាអ៊ីនចំនួន 206 គីឡូក្រាម ដែលរកឃើញនៅក្នុងរថយន្តដឹកមន្ត្រីការទូតប្រទេសកុងហ្គោម្នាក់។ នៅក្នុងសេចក្តីប្រកាសព័ត៌មាន ក្រសួងបានបន្តថា គ្រឿងញៀនត្រូវបានរកឃើញនៅក្នុងរថយន្តម៉ាក ឡេន រូវើ (Land Rover) ដែលមានស្លាកលេខការទូត បើកបរដោយជនជាតិប៊ុលហ្គារីម្នាក់ ដែលដឹកជនជាតិបែលហ្ស៊ិកម្នាក់ និងមន្ត្រីទូតរបស់សាធារណរដ្ឋប្រជាធិបតេយ្យកុងហ្គោម្នាក់ ដែលកំពុងធ្វើដំណើរពីប្រទេសបែលហ្ស៊ិក ទៅកាន់ប្រទេសតួរគី ដោយឆ្លងកាត់ប្រទេសប៊ុលហ្គារី ហើយបច្ចុប្បន្ន អ្នកដំណើរទាំងអស់នៅក្នុងរថយន្តត្រូវបានចាប់ខ្លួន ដើម្បីធ្វើការស៊ើបអង្កេត។ គួរបញ្ជាក់ផងដែរថា យោងតាមក្រសួង គ្រឿងញៀនកូកាអ៊ីនដែលរឹបអូសបាននេះ មានតម្លៃប្រមាណ 22 លានដុល្លារអាមេរិក នឹងជាការរឹបអូសដ៏ធំបំផុតក្នុងកំណត់ត្រារបស់ប្រទេសប៊ុលហ្គារី។
