យោងតាមមន្ត្រីប្រទេសបង់ក្លាដែសបានបញ្ជាក់កាលពីថ្ងៃអង្គារ ទី22 ខែកក្កដាថា យ៉ាងហោចណាស់មានកុមារ 25 នាក់ស្ថិតក្នុងចំណោមអ្នកស្លាប់ទាំង 27 នាក់ បន្ទាប់ពីការធ្លាក់យន្តហោះកងទ័ពអាកាសប្រទេសបង់ក្លាដែស ចូលទៅក្នុងបរិវេណមហាវិទ្យាល័យ និងសាលារៀនមួយកន្លែងក្នុងទីក្រុង ដាកា ។ ប្រភពបានបញ្ជាក់ថា ចំណោមអ្នកស្លាប់ ក្នុងនោះរួមមានកុមារ 25 នាក់ គ្រូបង្រៀន និងអ្នកបើកបរយន្តហោះ ខណៈដែលមនុស្ស 78 នាក់ទៀត កំពុងសម្រាកព្យាបាលនៅមន្ទីរពេទ្យ។ គួរបញ្ជាក់ផងដែរថា យន្តហោះ F7 BGI បានធ្លាក់ភ្លាមៗ បន្ទាប់ពីហោះចេញពីមូលដ្ឋានទ័ពអាកាសក្នុងរដ្ឋធានី ក្នុងបេសកកម្មហ្វឹកហាត់ជាធម្មតា ដោយយន្តហោះនេះ បានជួបប្រទះនឹងបញ្ហាម៉ាស៊ីន។ រដ្ឋាភិបាលប្រទេសបង់ក្លាដែស បានប្រកាសកាន់ទុក្ខមួយថ្ងៃសម្រាប់ជនរងគ្រោះដែលបានបាត់បង់ជិវិត ដោយបង្ហូតទង់ជាតិនៅត្រឹមពាក់កណ្តាលដង និងធ្វើការអធិស្ឋាននៅគ្រប់កន្លែងគោរពបូជា។
