អ្នកនាំពាក្យក្រសួងការបរទេសប្រទេសអ៊ីរ៉ង់ លោក អែសម៉ាអែល បាហ្កាអ៊ី (Esmaeil Baghaei) បានព្រមានថា អ៊ីរ៉ង់ នឹងធ្វើការ "ឆ្លើយតបយ៉ាងសមស្រប" ប្រសិនបើប្រទេសបារាំង អង់គ្លេស និងអាល្លឺម៉ង់ ជំរុញឲ្យមានយន្តការទណ្ឌកម្មមកលើប្រទេសអ៊ីរ៉ង់។ ការព្រមាននេះ ធ្វើឡើង បន្ទាប់ពីប្រទេសមហាអំណាចអ៊ឺរ៉ុបទាំងបីនេះ បានប្រកាសគម្រាមថានឹងដាក់ទណ្ឌកម្មអន្តរជាតិឡើងវិញ ជុំវិញសកម្មភាពនុយក្លេអ៊ែររបស់ប្រទេសអ៊ីរ៉ង់។ គួរបញ្ជាក់ផងដែរថា យន្តការទណ្ឌកម្ម គឺជាផ្នែកមួយនៅក្នុងកិច្ចព្រមព្រៀងកម្មវិធីនុយក្លេអ៊ែរឆ្នាំ 2015 រវាងទីក្រុងតេអេរ៉ង់ និងមហាអំណាចពិភពលោក ឬហៅកាត់ថា ផែនការសកម្មភាពរួម (JCPOA) ដែលនឹងអនុញ្ញាតឲ្យភាគីផ្សេងទៀត ដាក់ទណ្ឌកម្មអន្តរជាតិឡើងវិញទាំងអស់ ប្រសិនបើប្រទេសអ៊ីរ៉ង់មិនគោរពតាមកិច្ចព្រមព្រៀងនោះ។
