លោកប្រធានាធិបតីសហរដ្ឋអាមេរិក ដូណាល់ ត្រាំ បានប្រកាសកាលពីថ្ងៃព្រហស្បតិ៍ ទី10 ខែកក្កដាថា សហរដ្ឋអាមេរិកនឹងដាក់ពន្ធ 35% លើការនាំចូលទំនិញពីប្រទេសកាណាដានាខែក្រោយនេះ ហើយគ្រោងនឹងដាក់ពន្ធពីចន្លោះ 15% ឬ 20% លើដៃគូពាណិជ្ជកម្មផ្សេងៗជាច្រើនទៀត។ នៅក្នុងលិខិតពន្ធ លោកប្រធានាធិបតី ត្រាំ បានរំលឹកប្រាប់លោកនាយករដ្ឋមន្ត្រីប្រទេសកាណាដា ម៉ាក ខានី (Mark Carney) ថា អត្រាពន្ធថ្មីនេះ នឹងចូលជាធរមាននៅថ្ងៃទី 1 ខែសីហាខាងមុខ ហើយអត្រាពន្ធនឹងកើនឡើង ប្រសិនបើប្រទេសកាណាដា ហ៊ានធ្វើការសងសឹក។ គួរបញ្ជាក់ផងដែរថា លោកប្រធានាធិបតី ត្រាំ បានប្រកាសសង្រ្គាមពន្ធរបស់លោកក្នុងរយៈពេលប៉ុន្មានថ្ងៃថ្មីៗនេះ ដោយកំណត់អត្រាពន្ធថ្មីលើប្រទេសជាច្រើន រួមទាំងសម្ព័ន្ធមិត្តរបស់ខ្លួន ដូចជាប្រទេសជប៉ុន និងកូរ៉េខាងត្បូង ព្រមទាំងអត្រាពន្ធ 50% រួមលើទង់ដែង។
