យោងតាមប្រភពពីរដ្ឋាភិបាលប្រទេសវៀតណាមបានឲ្យដឹងថា គិតត្រឹមថ្ងៃអាទិត្យ ទី20 ខែកក្កដា ចំនួនអ្នកស្លាប់ដោយឧបទ្ទវហេតុលិចទូកទេសចរណ៍មួយគ្រឿងនៅឆ្នេរសមុទ្រ ហាឡុង (Halong) របស់ប្រទេសវៀតណាម បានកើនឡើងដល់ 38 នាក់ហើយ ខណៈដែលមនុស្ស 12 នាក់ត្រូវបានជួយសង្រ្គោះ។ នេះ គឺជាឧបទ្ទវហេតុដ៏អាក្រក់បំផុតមួយដែលកើតឡើងក្នុងប្រទេសវៀតណាមក្នុងរយៈពេលប៉ុន្មានឆ្នាំចុងក្រោយនេះ។ ទូកដែលផ្ទុកមនុស្សសរុបចំនួន 53 នាក់ បានក្រឡាប់លិចកាលពីថ្ងៃសៅរ៍ ទី19 ខែកក្កដា ខណៈដែលព្យុះ វីផា (Wipha) កំពុងបោកបក់ឆ្លងកាត់ប្រទេសនេះ។ គួរបញ្ជាក់ផងដែរ ថា ព្យុះ វីផា ដែលជាព្យុះទីហ្វុងទី 3 បានបោកបក់កាត់សមុទ្រចិនខាងត្បូងក្នុងឆ្នាំនេះ ជាមួយនឹងការព្យាករណ៍ថា នឹងបោកបក់កាត់ឆ្នេរសមុទ្រភាគខាងជើងនៃប្រទេសវៀតណាមនៅដើមសប្តាហ៍ក្រោយ។
