អាជ្ញាធរក្នុងតំបន់ បានអំពាវនាវឲ្យពលរដ្ឋរុស្ស៊ីរក្សាភាពស្ងប់ស្ងាត់ ខណៈដែលគ្រោះរញ្ជួយដីកម្រិត 8.8 រ៉ិចទ័រ បានវាយប្រហារលើឧបទ្វីប កាំឆាតកា (Kamchatka) របស់ប្រទេសរុស្ស៊ី កាលពីថ្ងៃពុធ ទី30 ខែកក្កដា ដោយបង្កឲ្យមានរលកយក្សស៊ូណាមិកម្ពស់ដល់ទៅ 4 ម៉ែត្រ ដែលជំរុញឲ្យមានការជម្លៀសប្រជាជនចេញពីតំបន់។ អភិបាលក្រុង កាំឆាតកា បាននិយាយថា "គ្រោះរញ្ជួយដីនេះ គឺជាការរញ្ជួយខ្លាំងបំផុតក្នុងរយៈពេលជាច្រើនទសវត្សរ៍ ដែលបានបង្កជារលកយក្សស៊ូណាមិ តែយោងតាមព័ត៌មានបឋម មិនមានការស្លាប់ និងរងរបួសនោះទេ ប៉ុន្តែអគារមួយចំនួនរងការខូចខាត។ ទន្ទឹមនឹងនេះ រដ្ឋាភិបាលរបស់ប្រទេសជប៉ុន ក៏បានចេញការព្រមានអំពីរលកយក្សស៊ូណាមិ និងព្រមានពីការជម្លៀសប្រជាជនចេញពីឆ្នេរសមុទ្រភាគខាងកើតរបស់ប្រទេស បន្ទាប់ពីគ្រោះរញ្ជួយដីកម្រិត 8.8 រិចទ័រនេះ វាយប្រហារតំបន់ភាគខាងកើតប្រទេសរុស្ស៊ី។ គួរបញ្ជាក់ផងដែរថា យោតាមប្រព័ន្ធព្រមានរលកយក្សស៊ូណាមិរបស់សហរដ្ឋអាមេរិកក៏បានចេញការព្រមានអំពី "រលកយក្សស៊ូណាមិ" នៅតាមឆ្នេរសមុទ្រមួយចំនួននៃប្រទេសរុស្ស៊ី ជប៉ុន អាឡាស្កា និងហាវ៉ៃ។
