បន្ទាយមានជ័យ ៖
ពលរដ្ឋថៃលួចឆ្លងដែនចូលមកកម្ពុជាដោយខុសច្បាប់ដើម្បីរកការងារធ្វើ ត្រូវបានកម្លាំងឈរជើងជួរមុខកម្ពុជាបណ្តេញចេញចូលប្រទេសវិញ នៅថ្ងៃទី១២ ខែកក្តដា ឆ្នាំ២០២៥ ខណៈដែរភាពតានតឹងនៅតាមបន្ទាត់ព្រំដែននៅតែបន្តនៅឡើយ ដោយភាគីថៃ បានសម្រេចបិទច្រកព្រំដែនរវាងកម្ពុជា-ថៃ ជាឯកតោភាគី និងមានការរឹតត្បឹតការឆ្លងដែន ចូលក្នុងទឹកដីរបស់ខ្លួន។
ប្រភពពីកងកម្លាំងឈរជើងជួរកម្ពុជា បានឲ្យដឹងថា៖ ប្រជាជនថៃ បានលួចឆ្លងដែនខុស ច្បាប់ចូលមកកម្ពុជា ក្នុងភូមិសាស្រ្តស្រុកម៉ាឡៃ ខេត្តបន្ទាយមានជ័យ ដើម្បីមករកការងារ ធ្វើចំនួន៧នាក់(ប្រុស៧នាក់) នៅថ្ងៃទី១២ ខែកក្តដា ឆ្នាំ២០២៥ ដោយសារភាគីប្រទេស របស់ខ្លួន បានសម្រេចបិទច្រកព្រំដែនជាមួយកម្ពុជា ដោយឯកតោភាគី និងមានការឹតត្បឹត ការឆ្លងដែនចូលក្នុងទឹកដីររបស់ខ្លួន ធ្វើឱ្យប៉ះពាល់យ៉ាងខ្លាំងលើជីវភាពប្រចាំថ្ងៃប្រជាជនថៃ ។
ប្រភពដដែល បានឲ្យដឹងទៀតថា៖ ដោយសារតែអត់ការងារធ្វើ ជនជាតិថៃទាំងនេះបាន លួចឆ្លងដែន ទាំងប្រថុយប្រថានចូលទឹកដីកម្ពុជា ប៉ុន្តែត្រូវបានកងកម្លាំងដែលឈរជើង តាមបន្ទាត់ព្រំដែន ហាមឃាត់ និងបណ្តេញចេញពីកម្ពុជាឱ្យវិលត្រឡប់ទៅកាន់ប្រទេស របស់ខ្លួនវិញ។
គួរបញ្ជាក់ថា៖ សកម្មភាពដែលភាគីថៃបិទព្រំដែនជាឯកតោភាគីជាមួយកម្ពុជាកន្លងមកនេះ បានធ្វើឱ្យប្រជាជនរបស់ថៃ ជាពិសេសអាជីវករដែលលក់ដូរនៅក្នុងផ្សារជាប់ព្រំដែនកម្ពុជា បានខឹងសម្បាយ៉ាងខ្លាំងទៅលើអាជ្ញាធររបស់ខ្លួន ក៏ដូចជាយោធាថៃ ដែលបានបិទច្រក ព្រំដែនធ្វើឱ្យប៉ះពាល់ជីវភាពការប្រកបមុខរបររកស៊ីប្រចាំថ្ងៃ របស់ពួកគេ។ ហើយកន្លងទៅថ្មីៗនេះ អាជីវករថៃបានធ្វើការតវ៉ាជាមួយនឹងអាជ្ញាធររបស់ខ្លួន នៅមុខច្រក អន្តរជាតិប៉ោយប៉ែត ដើម្បីឱ្យភាគីថៃបើកច្រកជាមួយកម្ពុជាឡើងវិញផងដែរ៕
